آئی ایم ایف کا موجودہ پروگرام آخری پروگرام ہو گا،آخری حد تک آپ کو قرضوں سے نجات دلاوں گا، وزیراعظم کا پرائم منسٹر ڈیجیٹل یوتھ ہب کی افتتاحی تقریب سے خطاب
اسلام آباد ( نیوز ڈیسک ) وزیراعظم شہباز شریف کا کہنا ہے کہ قوم کو قرضوں کی زندگی سے جان چھڑانا ہوگی، عالمی مالیاتی فنڈ(آئی ایم ایف) کا موجودہ پروگرام آخری پروگرام ہو گا،آخری حد تک آپ کو قرضوں سے نجات دلاوں گا، قرضوں سے ترقی نہیں ہوتی،میری دعا ہے کہ آئی ایم ایف کا پروگرام آخری پروگرام ہو،اسلام آباد میں پرائم منسٹر ڈیجیٹل یوتھ ہب کی افتتاحی تقریب سے خطاب کرتے ہوئے وزیراعظم نے کہا کہ آئی ایم ایف کے پروگراموں سے معاشی استحکام تو آتا ہے لیکن قومیں ترقی نہیں کرتیں۔
نوجوانوں کی بہترین ٹریننگ کیلئے اربوں ہوں یا کھربوں قدموں میں نچھاور کردوں گا۔ سرمایہ نچھاور کریں گے تو پاکستان دنیا کا سب سے ترقی یافتہ ملک بنے گا۔ نوجوانوں کو خودمختار بنانے کیلئے درکار اخراجات فراہم کئے جائیں گے۔
ہمارے ٹریننگ سینٹرز میں بہترین ٹرینرز آنے چاہئیں۔ نوجوان ہمارا اثاثہ ہیں انہیں بہترین ہنر سے نوازیں گے۔ ہنر مند نوجوانوں کی بدولت ملک کا مستقبل شاندار بنائیں گے۔
پاکستان کے نوجوانوں کو باعزت روزگار کے حصول کے قابل بنانا ہے۔نوجوان نسل کی محنت اور ہنر کی بدولت قرض کی زندگی کو وقار کی زندگی میں بدلنا ہے ۔نوجوانوں کو آئی ٹی، اےآئی اور ووکیشنل ٹریننگ دی جائے تو ملک کا سرمایہ بنیں گے۔انہوں نے کہا کہ آج کی دنیا جدید ترین ٹیکنالوجی کی متقاضی ہے۔ اگر مختلف ممالک تیل، گیس اور معدنیات سے مالا مال ہیں تو کروڑوں نوجوان پاکستان کا سرمایہ ہیں۔
آئی ایم ایف پروگرام سے قومیں ترقی نہیں کرتیں۔پاکستان کی معیشت مستحکم ہوئی ہے تین ہفتے میں 34 ارب روپے خزانے میں آئے ہیں۔تقریب سے خطاب کرتے ہوئے وزیراعظم شہبازشریف کا مزید کہنا تھا کہ قوم کو قرضوں کی زندگی سے جان چھڑانا ہوگی ہم نے اس قرضے کی زندگی کو وقار کی زندگی میں بدلنا ہے۔ ہمارے قرضے 77 سالوں میں بڑھے ہیں۔آئی ایم ایف سے سٹاف لیول معاہدہ ہوگیا ہے لیکن یہ ایک ملین ڈالر قرض ہے ہم نے کمایا نہیں ہے۔ان کا یہ بھی کہنا تھا کہ میںآخری حد تک آپ کو قرضوں سے نجات دلاوں گا۔ خادم بن کر پاکستان کی خدمت کرتا رہوں گا۔ وعدہ کرتا ہوں قوم کو مایوس نہیں کروں گا۔میں آخری دم تک آپ کے حقوق کی جنگ لڑتا رہوں گا۔
