وزیر داخلہ کا ڈی جی خان میں دہشتگردوں کا حملہ ناکام بنانے پر پولیس کو خراج تحسین، پولیس نے جرات کے ساتھ خوارجی دہشتگردوں کو مار بھگایا اور مذموم عزائم کو خاک میں ملایا، وفاقی وزیر داخلہ کا بیان
اسلام آباد ( نیوز ڈیسک ) وفاقی وزیر داخلہ محسن نقوی نے کہا ہے کہ پنجاب پولیس کے بہادر سپوتوں نے خوارجی دہشت گردوں کا حملہ پسپا کیا ،وزیر داخلہ کا ڈی جی خان میں دہشتگردوں کا حملہ ناکام بنانے پر پولیس کو خراج تحسین، پولیس نے جرات کے ساتھ خوارجی دہشتگردوں کو مار بھگایا اور مذموم عزائم کو خاک میں ملایا، اپنے ایک بیان میں وفاقی وزیر داخلہ محسن کا کہنا ہے کہ ڈیرہ غازی خان کے تھانہ واہوا کی جھنگی پولیس چوکی پردہشتگردوں کا حملہ ناکام بنانے والے پولیس جوان شاباش کے مستحق ہیں۔
پنجاب پولیس کے بہادر سپوتوں نے پہلے بھی دلیری کے ساتھ خوارجی دہشت گردوں کے حملوں کو پسپا کیا ہے۔انہوں نے کہا کہ خوارجی دہشتگردوں کے خلاف پولیس جوان سیسہ پلائی دیوار بنے رہے اور جوانمردی سے حملہ پسپا کیا۔
پولیس کی پیشہ وارانہ صلاحیتوں اور جرات پر فخر ہے۔ خوارجی دہشتگردوں کا حملہ ناکام بنانے پر پنجاب پولیس مبارکباد کی مستحق ہے۔
واضح رہے کہ ڈیرہ غازی خان پولیس نے سرحدی تھانہ وہوا کی جھنگی چیک پوسٹ پر خارجی دہشت گردوں کا بڑا حملہ پسپا کر دیاتھا۔ترجمان پنجاب پولیس کاکہنا تھاکہ خوارجی دہشت گردوں نے تھانہ وہوا کی جھنگی پولیس چیک پوسٹ پر 20 سے 25 دہشت گردوں نے رات کی تاریکی کا فائدہ اٹھاتے ہوئے مختلف اطراف سے حملہ کیا، دہشت گردوں نے راکٹ لانچرز، جدید خود کار اسلحہ کا استعمال کیاتھا۔
پنجاب پولیس کے مطابق پولیس کی جوابی کارروائی میں دہشت گردوں کو جانی نقصان پہنچنے کی اطلاعات بھی ملی تھیں۔پنجاب پولیس کا یہ بھی کہنا تھاکہ چوکی پر تعینات پنجاب پولیس کے مستعد اہلکاروں نے زبردست مزاحمت اور جوابی فائرنگ سے حملہ ناکام بنا دیا اور پولیس کی جوابی کارروائی سے دہشت گرد پسپا ہو کر فرار ہو گئے تھے۔آئی جی پنجاب ڈاکٹر عثمان انور نے خوارجی دہشت گردوں کا حملہ ناکام بنانے پر ڈیرہ غازی خان پولیس کو شاباش دی تھی۔
آئی جی پنجاب پولیس کا یہ بھی کہنا تھا کہ جھنگی پولیس چیک پوسٹ پنجاب حکومت کی فنڈنگ سے مزید محفوظ بنائی جا چکی تھی۔ چوکی پر اضافی نفری، جدید آلات اور اسلحہ پہلے سے فراہم کیا گیا تھا۔پنجاب پولیس کے بہادر سپاہی ملک و قوم کے دشمنوں کے سامنے سیسہ پلائی دیوار ثابت ہوئے تھے۔
