پاکستان کرپٹو کونسل متعلقہ سٹیک ہولڈرز اور ریگولٹری باڈیز کو اکٹھا کرے گا؛ محمد اورنگیزب کی اجلاس میں گفتگو
اسلام آباد ( نیوز ڈیسک ) وفاقی وزیر خزانہ محمد اورنگزیب کا کہنا ہے کہ پاکستان کرپٹو کونسل ہماری معیشت کیلئے ایک نئے ڈیجیٹل باب کا آغاز ہے۔ تفصیلات کے مطابق وزیر خزانہ محمد اورنگزیب کی زیر صدارت پاکستان کرپٹو کونسل کا پہلے اجلاس منعقد کیا گیا، اجلاس میں کرپٹو کونسل کے سی ای و بلال بن ثاقب، گورنر سٹیٹ بینک اور چیئرمین ایس ای سی پی بھی شریک ہوئے، اجلاس میں بلال بن ثاقب نے کرپٹو کونسل کے لیے ایک جامع وژن اور مشن پیش کیا۔
اجلا س کے موقع پر اظہار خیال کرتے ہوئے وزیر خزانہ محمد اورنگزیب نے کہا کہ پاکستان کرپٹو کونسل متعلقہ سٹیک ہولڈرز اور ریگولٹری باڈیز کو اکٹھا کرے گا، یہ ہماری معیشت کے لیے ایک نئے ڈیجیٹل باب کا آغاز ہے۔
بتایا جارہا ہے کہ حکومت نے کرپٹ کونسل کا قیام کرتے ہوئے وزیر خزانہ کے چیف ایڈوائزر برائے پاکستان کرپٹو کونسل بلال بن ثاقب کو کونسل کا سی ای او مقرر کیا ہے، بلال بن ثاقب بلاک چین ٹیکنالوجی، سرمایہ کاری حکمت عملی اور ڈیجیٹل جدت کے شعبے میں مہارت کو بروئے کار لاتے ہوئے اس کی قیادت کریں گے جب کہ وفاقی وزیرخزانہ محمد اورنگزیب نے ملک میں جلد ہی کرپٹو کرنسی متعارف کرانے کی تجویز دی ہے، پاکستان بینکس ایسوسی ایشن کے تحت پہلی پاکستان بینکنگ سمٹ 2025 کی تقریب سے خطاب کرتے ہوئے انہوں نے پاکستان کے بینکنگ سسٹم کی ڈیجیٹلائزیشن پر زور دیتے ہوئے کرپٹو کرنسی کو متعارف کرانے کی ضرورت کی بھی نشاندہی کی، وزیر خزانہ کا کہنا تھا کہ ملک میں ڈیجیٹل بینکنگ تیزی سے بڑھ رہی ہے، اس لیے سٹیٹ بینک ملک میں کرپٹو کرنسی متعارف کرانے پر کھلے دل سے غور کرے کیوں کہ غیر رسمی مارکیٹ میں تو پہلے سے ہی کرپٹو کرنسی کا استعمال ہورہا ہے، ڈیجیٹل اثاثوں اور اے آئی کیلئے ایک ریگولیٹری فریم ورک کی تیاری بھی وقت کی ضرورت ہے، تمام ابھرتی منڈیاں مختلف ہیں، ہمیں ایک دوسرے سے سیکھنا ہوگا، کرکٹ ٹیم کے ساتھ ہماری دعائیں تھیں، برآمدات میں معدنیات کی کافی صلاحیت ہے، اگر ٹیکس کی بنیاد کو وسیع اور گہرا نہیں کریں گے تو پائیدار ترقی ممکن نہیں ہے، ریونیو لیکیجز اور کرپشن کو ختم کرنا ہے، جس کے ذریعے تنخواہ دار طبقے کو ریلیف دیں گے، ہم ایکسپورٹس کو بڑھائیں گے اور سرحدوں کی کڑی نگرانی جاری رکھیں گے، یہی وجہ ہے کہ ملک سے پہلی بار شوگر اسمگل نہیں بلکہ برآمد کی گئی۔
