ملک میں سول مارشل لاء ہے، قوم حکمران اور اداروں کے ساتھ ہو تو دہشتگردوں کے خلاف لڑا جاسکتا ہے، ملک کی سکیورٹی کا معاملہ ہے تو ان کیمرہ بریفنگ میں شرکت کریں گے؛ شیخ وقاص اکرم کی پریس کانفرنس
پشاور ( نیوز ڈیسک ) پاکستان تحریک انصاف کے سیکریٹری اطلاعات شیخ وقاص اکرم کا کہنا ہے کہ اس وقت ملک میں سول مارشل لاء ہے، قوم حکمران اور اداروں کے ساتھ ہو تو دہشتگردوں کے خلاف لڑا جاسکتا ہے، دہشت گردوں کو بھی معلوم ہے کہ قوم حکومت کے ساتھ نہیں۔ پشاور میں پریس کانفرنس کرتے ہوئے انہوں نے کہا کہ آج کی حکومت میں ظلم کے خلاف اٹھنے والی آواز کو دبایا جارہا ہے، آج عوام حکومت کی فسطائیت کا شکار ہیں، ہم نے مظلوم کی آواز بننا ہے، آج ہمارا قائد جعلی مقدمات ہیں 590 دنوں سے قید ہے، کیا آج کا پاکستان قائداعظم کا پاکستان ہے؟ کیا قائداعظم نے پاکستان اس لیے بنایا تھا کہ آزادی اظہار رائے نہ ہو؟ کیا پاکستان اس لیے بنایا تھا کہ فسطائیت ہو؟ عوام کو اٹھایا جائے؟، عمران خان کا قصور کیا تھا؟ ان کو قائداعظم کے پاکستان کے لیے آواز اٹھانے کی سزا دی جارہی ہے، آج گھٹن کا پاکستان ہے جہاں آواز نہیں اٹھا سکتے لکھ نہیں سکتے۔
شیخ وقاص اکرم نے کہا کہ دہشت گردی کی کارروائیوں میں 2022ء کے بعد اضافہ ہوتا جا رہا ہے، پاکستان کی 85 فیصد آبادی جسے اپنا لیڈر مانتی ہے، اسے 590 روز سے دور رکھا ہوا ہے، پاکستان کے مسائل کا حل عمران خان کے پاس ہے، یہ زبردستی اپنے فیصلے مسلط کرسکتے ہیں لیکن عوام جبر کے فیصلے نہیں مانتے، حکمرانوں کے غیر سنجیدہ رویے سے عوام اور حکومت کے درمیان خلیج پیدا ہورہی ہے۔
ان کا کہنا ہے کہ ہمارے سوشل میڈیا کے نمائندوں کو گرفتار کیا جارہا ہے، حیدر سعید پی ٹی آئی سوشل میڈیا کا حصہ نہیں لیکن وہ اس ملک کا نوجوان ہے اگر اس نے کوئی غلط کام کیا ہے تو اسے قانون کے مطابق پوچھ گچھ کریں، اغواء کرنے کی کیا ضرورت ہے؟ ابھی تک حیدر سعید کو کسی عدالت یا پولیس اسٹیشن میں پیش نہیں کیا گیا، قانون موجود ہے، قانون کے مطابق کارروائی کریں، ہمارے سوشل میڈیا ٹیم کے کئی کارکن گرفتار ہیں، جن سوشل میڈیا ورکرز کو اٹھایا گیا ہے ان کے اکاؤنٹس بند ہیں، ہمارے 5 سوشل میڈیا ورکرز کو گرفتار کرکے عدالتوں میں پیش نہیں کیا گیا۔
ہمیں معلوم ہے کہ آپ نے قانون کو تماشا بنایا ہوا ہے۔ ترجمان پی ٹی آئی کہتے ہیں کہ یہاں دہشت گردی کا بڑا مسئلہ ہے، اسے حل کریں، جب دہشت گردوں کو معلوم ہو قوم اکٹھی ہے وہ بھی حملے نہیں کرسکتے لیکن اس وقت دہشت گردوں کو بھی معلوم ہے کہ قوم حکومت کے ساتھ نہیں، قوم حکمران اور اداروں کے ساتھ ہو تو دہشت گردوں کے خلاف لڑا جاسکتا ہے، اس وقت ملک میں سول مارشل لا ہے لیکن بندوق سے تمام مسائل حل نہیں ہوتے، سوات آپریشن کا فیصلہ ہوا تو پارلیمنٹ میں یہ معاملہ زیر بحث آیا اور اسے عوامی حمایت حاصل ہوئی، اگر دہشت گردوں کے خلاف آپریشن کو عوامی حمایت حاصل نہیں تو پی ٹی آئی اس کی حمایت نہیں کرے گی۔
شیخ وقاص اکرم نے مزید کہا کہ ان کیمرہ میٹنگ میں تحریک انصاف شرکت کرے گی، ان کیمرہ میٹنگ کے حوالے سے تحریک انصاف کے بڑوں کا اجلاس ابھی ہونے والا ہے، ملک کی سکیورٹی کا معاملہ ہے تو ان کیمرہ بریفنگ میں شرکت کریں گے، ہم چاہتے ہیں عید سے قبل اپوزیشن جماعتوں کا اتحاد بن جائے اور عید کے فوری بعد احتجاج کریں، مولانا فضل الرحمان سے معاملات طے پا گئے ہیں، صرف عمران خان سے ملاقات کا انتظار ہے، مولانا فضل الرحمان کے جو تحفظات تھے ا نہیں دور کرنے کی یقین کرائی گئی ہے۔
