اپوزیشن کے لوگ ہوں، حکومت ہو یا مقتدرہ کے لوگ ہیں، سب کو اکٹھے بیٹھنا ہے، ہمیں سب سیاسی اختلافات بھلا کر ملک کو اس مشکل سے نکالنا ہے، اس میں پی ٹی آئی مثبت کردار ادا کرے گی؛ میڈیا سے گفتگو
اسلام آباد ( نیوز ڈیسک ) پاکستان تحریک انصاف کے سیکریٹری جنرل سلمان اکرم راجہ کا کہنا ہے کہ بلوچستان میں جو جعفر ایکسپریس والا واقعہ ہوا اس کے بعد اب کوئی گنجائش نہیں ہے کہ ہم سب مل کر اکٹھے نہ بیٹھیں، چاہے ہم اپوزیشن میں ہوں، حکومت کے لوگ ہوں یا مقتدرہ کے لوگ ہیں، سب کو اکٹھے بیٹھنا ہے، اس وقت ہم نے لوگوں کے دکھوں کا مداوا کرنا ہے، لوگوں کے زخم بھرنے ہیں، ہمیں سب سیاسی اختلافات بھلا کر اس ملک کو اس مشکل سے نکالنا ہے اور آپ دیکھیں گے اس میں پی ٹی آئی اپنا بہت مثبت کردار ادا کرے گی۔
جوڈیشل کمپلیکس کے باہر میڈیا سے گفتگو کرتے ہوئے انہوں نے کہا کہ کل میری بانی چیئرمین پی ٹی آئی عمران خان سے ملاقات ہوئی اور انہوں نے ہدایت دی ہے کہ ہم جے یو آئی ف سے بات چیت کو بڑھائیں، ہم نے جمہوریت کے لیے اور انسانی حقوق کے لیے ہاتھ بڑھایا ہے، اس میں جو بھی ہمارے ساتھ چلے گا ہم خوش آمدید کہیں گے، جو کوئی سندھ، بلوچستان، پنجاب، گلگت بلتستان اور دوسرے صوبوں کے حقوق کی بات کرے گا ہم ساتھ دیں گے، مجھے نہیں لگتا کہ کوئی ہمارے ساتھ چل کر آگے ہمیں چھوڑ دے گا، اگر کوئی دو قدم چلنے کے بعد چھوڑ دے گا تو وہ اپنا نقصان کرے گا قوم اسے معاف نہیں کرے گی۔
علیمہ خان اور نعیم حیدر پنجوتھہ واقعے سے متعلق سوال پر سلمان اکرم راجہ نے جواب دیا کہ کل جو واقعہ اڈیالہ کے باہر ہوا یہ عام بات ہے وہاں کوئی دوست موجود تھا، اس نے اس کو ریکارڈ کیا اور بات کو بڑا کردیا، نعیم حیدر پنجوتھہ ہمارے اہم رکن ہیں، انہوں نے پی ٹی آئی ورکرز اور ان کے کیسز کے حوالے سے کافی کام کیا ہے، پی ٹی آئی میں کوئی اختلاف نہیں ہے، یہ چھوٹی موٹی باتیں ہوتی رہتی ہیں، ہمارا نظریہ ایک ہے، ہمارا لیڈر ایک ہے، ہمارا مقصد ایک ہے، ہماری تحریک ایک ہے، ہم سندھ میں جی ڈی اے کے پاس گئے، شاہد خاقان عباسی بھی ہمارے مؤقف کے ساتھ ہیں۔
