جنرل عاصم منیر نے اپنے ادارے کا احتساب سب سے پہلے کیا، میری ٹائم میں کرپشن کے پلندے لے کر آیا ہوں، 8 ماہ تک ثبوت اکٹھے کیے اور مطالعہ کیا؛ قائمہ کمیٹی میری ٹائم کے اجلاس میں گفتگو
اسلام اباد ( نیوز ڈیسک ) آزاد حیثیت سے منتخب سینیٹر فیصل واوڈا کا کہنا ہے کہ آرمی چیف نے اپنے ادارے کا احتساب سب سے پہلے کیا، جس سے جنرل عاصم منیر نے واضح پیغام دے دیا کہ پاکستان سب سے پہلے ہے۔ میڈیا رپورٹس کے مطابق سینیٹر فیصل واوڈا کی زیرِ صدارت سینیٹ کی قائمہ کمیٹی میری ٹائم کا اجلاس ہوا جہاں گفتگو کرتے ہوئے انہوں نے کہا کہ سیکریٹری میری ٹائم نے 60 ارب روپے کی چوری بچانے میں کردار ادا کیا، میری ٹائم میں کرپشن کے پلندے لے کر آیا ہوں، میری ٹائم میں 8 ماہ تک ثبوت اکٹھے کیے اور مطالعہ کیا۔
ان کا کہنا ہے کہ میری ٹائم کے 728 صفحات پڑھ کر آیا ہوں، سیکریٹری میری ٹائم نے 60 ارب روپے کی زمین کا پراسیس منسوخ کیا، ہم نے 60 ارب روپے کی کرپشن روک لی، مجھے 2005ء اور 2015ء کا بیک گراؤنڈ بھی پتا ہے، مجھے یہ بھی پتا ہے کہ اس کیس کی کب سے سماعت نہیں ہوئی، اگر یہ معاہدہ ٹھیک تھا تو اتوار کو دفتر کھول کر معاہدہ کیوں منسوخ کیا گیا؟ میری ٹائم کے ایسے ایسے ثبوت دوں گا کہ حیران رہ جائیں گے، وہ ثبوت دے رہا ہوں جو ایف آئی اے کو برسوں نہیں ملتے۔
فیصل واوڈا نے بتایا کہ پورٹ قاسم کی 500 ایکڑ زمین 10 لاکھ فی ایکڑ سے دینے کا فیصلہ ستمبر 2024ء میں ہوا، پورٹ قاسم کی 365 ایکڑ زمین کی رقم کے بدلے 500 ایکڑ زمین دینے کا فیصلہ کیا گیا، پورٹ قاسم کی زمین صرف 8 فیصد دینے کا فیصلہ کیا گیا، ایک ڈیفالٹر کمپنی کے لیے نرم گوشہ پیدا کیا گیا، ڈیفالٹر کمپنی فارن کمپنی بن کر آئی اور پھر لوکل کمپنی نکلی، دھوکہ دینے والی کمپنی کے ساتھ آؤٹ آف کورٹ سیٹلمنٹ نہیں ہوسکتی، یہ کمپنی دھوکے سے فارن کمپنی بن کر آئی، بورڈ کیوں اس کمپنی کو فیور کر رہا ہے۔
