خیبرپختونخواہ حکومت نے مریم نواز کی 150 تصاویر کے مقابلے میں 625 ترقیاتی منصوبوں کی کارکردگی رپورٹ جاری کی، فارم 45 اور فارم 47 کے وزیراعلیٰ میں یہی فرق ہوتا ہے؛ صوبائی مشیراطلاعات کا بیان
پشاور ( نیوز ڈیسک ) خیبرپختونخواہ حکومت کے ترجمان بیرسٹر سیف نے دعویٰ کیا ہے کہ خیبر پختونخواہ میں صوبائی حکومت کی ایک سال کی کارکردگی دیگر صوبائی حکومتوں پر سبقت لے گئی ہے، علی امین گنڈاپور حقیقی معنوں میں عوام کی خدمت کررہے ہیں، فارم 45 اور فارم 47 کے وزیراعلیٰ میں یہی فرق ہوتا ہے۔ اس حوالے سے اپنے ایک بیان میں انہوں نے کہا کہ خیبرپختونخواہ کی کارکردگی مریم نواز کی طرح محض تصویری نمائش تک محدود نہیں، مریم نواز صرف اخبارات میں اپنی تصاویر شائع کروانے کو کارکردگی سمجھتی ہیں جب کہ خیبر پختونخواہ حکومت نے مریم نواز کی 150 تصاویر کے مقابلے میں 625 ترقیاتی منصوبوں کی کارکردگی رپورٹ جاری کی۔
بیرسٹر سیف کہتے ہیں کہ خیبر پختونخواہ حکومت نے اپنی ایک سالہ کارکردگی کو کتابی شکل میں شائع کیا، جس میں ایک سال کے دوران 25 مختلف شعبوں کے 25، 25 نمایاں منصوبوں کا ذکر کیا گیا ہے، مجموعی طور پر ایک سال میں علی امین گنڈا پور کی قیادت میں خیبر پختونخواہ حکومت نے عوامی فلاح و بہبود کے 625 منصوبے شروع کیے، مریم نواز اپنی ذاتی تشہیر سے نکل کر علی امین کی طرح عوامی فلاح کا سوچیں۔
اسی طرح پشاور میں تقریب سے خطاب کرتے ہوئے وزیراعلیٰ خیبرپختونخواہ علی امین گنڈا پور نے کہا کہ وفاق سے رکاوٹوں کے باوجود صوبائی حکومت کی معاشی صورتحال تینوں صوبوں سے بہتر ہے، ہم نے مشکل حالات کے باوجود آمدن میں 55 فیصد اضافہ کیا، ہم نے اپنی پوری آبادی کو صحت کارڈ پلس دیا، خیبرپختونخوا واحد صوبہ ہے جس نے آئی ایم ایف کا ٹارگٹ حاصل کیا، باقی کسی دوسرے صوبے نے ایسا نہیں کیا، پنجاب کی کارکردگی ہماری ایک فیصد کارکردگی کے برابر بھی نہیں، کارکردگی پر وزیراعلیٰ پنجاب سے مناظرے کیلئے تیار ہوں۔
ان کا کہنا تھا کہ خیبرپختونخواہ حکومت کے پاس خزانے میں 176 ارب روپے کا سرپلس پڑا ہے، پنجاب بھی اپنی آمدن 12 فیصد سے 55 فیصد تک بڑھائے، پنجاب کے جتنے فیصد طلبہ کو لیپ ٹاپ دیئے جا رہے ہیں ہم بھی اتنے فیصد طلبہ کو مفت لیپ ٹاپ دیں گے، ہم چار ہزار مستحق بچیوں کی شادیاں کروا رہے ہیں اور ہر بچی کو دو لاکھ روپے دے رہے ہیں، اس کے علاوہ ہم نے اپنی پوری آبادی کو صحت کارڈ پلس دیا، اب لائف انشورنس کی سہولت دے رہے ہیں، وزیر اعلیٰ پنجاب، خیبر پختونخواہ حکومت کے طرز پر اپنے شہریوں کو مفت صحت کارڈ دے، پنجاب حکومت بھی اپنی پوری آبادی کو یہ سہولیات دے۔
