کرپشن، معاشی تباہی، مہنگائی اور بدتمیزی تبدیلی کی سوغاتیں تھیں، ہمارا بیانیہ ملک کی ترقی اور عوام کو مہنگائی سے نجات دلاکر خوش حال بنانا ہے، صدر ن لیگ کی اراکین اسمبلی سے گفتگو
لاہور(نیوز ڈیسک) پاکستان مسلم لیگ ن کے صدر نواز شریف کا کہناہے کہ عوام کی خدمت کا مشن چینلج سمجھ کر سنبھالا، پاکستان ڈیفالٹ کے منہ سے واپس آیا ہے، ہمارا بیانیہ ملک کی ترقی اور عوام کو مہنگائی سے نجات دلاکر خوش حال بنانا ہے، کرپشن، معاشی تباہی، مہنگائی اور بدتمیزی تبدیلی کی سوغاتیں تھیں، صدر ن لیگ اور وزیراعلیٰ پنجاب مریم نواز سے اراکین پنجاب اسمبلی نے ملاقات کی،اس موقع پر مسلم لیگ ن پنجاب کے صدر رانا ثناءاللہ ، سینیٹرپرویز رشید، مریم اورنگزیب سمیت دیگر رہنماء بھی موجود تھے۔
اراکین پنجاب اسمبلی سے گفتگو کرتے ہوئے مسلم لیگ ن کے صدر نوازشریف نے کہا کہ وزیراعظم شہبازشریف کی محنت سے معاشی استحکام واپس آیا ہے۔پالیسیوں کے تسلسل سے معاشی ترقی یقینی ہوگی۔
افسوس ماضی میں ترقی کرتے پاکستان کو پٹڑی سے اتار دیا گیا ۔معیشت اور اقدار تباہ کیں ، جمہوریت کی پیٹھ میں خنجر گھونپا گیا۔۔انہوں نے سیاست میں گند ڈال کر اسے تباہ کیا گیا ۔
بد تہذیبی، بدتمیزی، بغض اور انتقام کوسیاست بنا دیا گیا۔انہوں نے کہا کہ ہم نے جو وعدے کئے تھے اللہ تعالی کے فضل وکرم سے وہ آج عوام کو پورے ہوتے نظر آرہے ہیں۔ہم نے آئی ایم ایف کو خدا حافظ کہہ دیا تھا۔اس موقع پر گفتگو کرتے ہوئے وزیراعلیٰ پنجاب مریم نواز کا کہنا تھا کہ عوام کی خدمت کا مشن چیلنج سمجھ کر سنبھالا ، قیادت اور جماعت کا شکریہ جنہوں نے مجھے یہ ذمہ داری دی۔
ہماری اولین ترجیح عوام کی فلاح کرنا ہے ۔ نواز شریف کی قیادت میں پنجاب میں کئی منصوبے پایہ تکمیل پہنچ چکے ہیں۔اس موقع پر اراکین اسمبلی نے گفتگو کرتے ہوئے کہا کہ نوازشریف اور شہبازشریف نے ذاتی تکالیف بھلا کر ہمیشہ پاکستان اور عوام کی تکلیفیں دور کی ہیں۔ نوازشریف اور شہبازشریف وعدوں کی تکمیل وطن سے وفا کے نام ہیں ۔ پاکستان کے چپے چپے پر نوازشریف اور شہبازشریف کی ترقی کے نشان موجود ہیں۔
وزیراعظم شہباز شریف کی ذاتی کوششوں سے آئی ایم ایف پروگرام بحال ہوا اور ملک ڈیفالٹ سے بچ گیا۔وزیراعظم شہباز شریف نے پاکستان کے معاشی استحکام کیلئے شہباز سپیڈ سے کام کیا ہے۔اراکین اسمبلی کا گفتگو کرتے ہوئے مزید کہنا تھا کہ وزیراعلیٰ پنجاب مریم نواز جیسی عوامی خدمت کا تقاضا آج ہر صوبے میں ہورہا ہے۔ سیاسی وابستگی سے بالا تر ہوکر پورے پنجاب کی مساوی خدمت جاری ہے۔
چولستان میں گرین پاکستان منصوبے کے انقلابی پروگرام کے آغاز کا خیرمقدم کرتے ہیں، کسانوں کو جدید مشینری ، وسائل اور زرعی مالز کے ذریعے ایک چھت تلے تمام سہولیات کی فراہمی سے زرعی انقلاب برپا ہورہا ہے۔ پہلی خاتون وزیراعلیٰ کے طورپر مریم نواز کی عوامی خدمت کا ہر طرف اعتراف ہو رہا ہے۔ بے مثال سیاسی جدوجہد کے بعد عوامی خدمت میں بھی مریم نواز نے اپنی صلاحیتوں کا اعتراف کرایا ہے۔ مریم نوازنے نوازشریف اور شہبازشریف کے دور کی یاد تازہ کردی ہے۔ ہمیں اپنی وزیراعلیٰ پر فخر ہے۔
