اللہ تعالیٰ نے تیزی سے گڑھے میں گرتے ملک و قوم کو بچا لیا، ڈی ریل نہ کیا جاتا تو آج پاکستان کہیں آگے ہوتا، 1990ء کا سفر جاری رہتا تو ترقی کے سفر میں کہیں آگے کھڑے ہوتے؛ اراکین اسمبلی سے ملاقات میں گفتگو
لاہور ( نیوز ڈیسک ) مسلم لیگ ن کے صدر نواز شریف کا کہنا ہے کہ لاہور اور پنجاب میں بہت عرصے بعد عوام میں خوشی اور اطمینان نظر آ رہا ہے، شہباز شریف بہت محنت کر رہے ہیں، للہ کرے ہم ایک بار پھر ٹیک آف کرسکیں۔ تفصیلات کے مطابق لاہور میں مسلم لیگ ن کے صدر نواز شریف اور وزیراعلیٰ پنجاب مریم نواز سے صوبائی اسمبلی کے ارکان نے ملاقات کی، پارٹی کے سینئر رہنما سینیٹر پرویز رشید، رانا ثناء اللہ، پنجاب کی سینیئر وزیر مریم اورنگزیب اور راشد نصر اللہ بھی اس موقع پر موجود تھے، سمیع اللہ خان، غزالی سلیم بٹ، محمد ریاض، مجتبیٰ شجاع الرحمان، خواجہ عمران نزیر، سہیل شوکت بٹ، ملک محمد وحید، خواجہ سلمان رفیق، ملک غلام حبیب اعوان اور چوہدری محمد نواز بھی ملاقات میں شریک ہوئے، اس کے علاوہ ملک اسد علی کھوکھر، ملک شہباز علی کھوکھر، عمران جاوید، رانا راشد منہاس، محمد انس محمود، عرفان شفیع کھوکھر، بلال یاسین، مرغوب احمد اور فیصل ایوب بھی ملاقات کرنے والوں میں شامل تھے۔
اس موقع پر اظہار خیال کرتے ہوئے سابق وزیراعظم نواز شریف نے کہا کہ اللہ تعالیٰ نے تیزی سے گڑھے میں گرتے ملک اور قوم کو بچا لیا، زندگی میں بہت اتار چڑھاؤ دیکھے ہیں، مسلم لیگ ن آتی ہے تو ملک میں ترقی آتی ہے، اللہ تعالیٰ کا شکر ادا کرتے ہوئے محنت سے عوام کی خدمت کا سفر جاری رکھنا ہے، اللہ تعالیٰ نے برکت ڈالی ہے اور بھی ڈالے گا، مہنگائی میں کمی سے عوام کو سکھ کا کچھ سانس آیا ہے، پالیسی ریٹ 22 سے کم ہو کر 12 فیصد پر آنا معاشی بہتری کی علامت ہے، تاہم اگر ڈی ریل نہ کیا جاتا تو آج پاکستان کہیں آگے ہوتا، 1990ء کا سفر جاری رہتا تو پاکستان ترقی کے سفر میں آج کہیں آگے کھڑا ہوتا۔
ارکان پنجاب اسمبلی نے صدر ن لیگ کو مخاطب کرتے ہوئے کہا کہ آپ کی اور شہباز شریف کی روایات جس شاندار طریقے سے چل رہی ہیں وہ بے مثال ہے، ہمیشہ مسلم لیگ ن کے دور میں ہی ثقافت کو ترقی ملتی ہے، آپ جب جب آتے ہیں ملک کو ترقی، روشنی، خوشیاں اور رنگ ملتے ہیں، نظام کی اصلاح جو مریم نواز نے کی اس کی اور مثال نہیں ملتی، ای ٹینڈرنگ کا شفاف نظام شروع کیا گیا، میرٹ پر یکساں اور معیاری ترقی کا سفر آگے بڑھ رہا ہے، واہگہ ٹورازم کوریڈور کی تعمیر بے مثال ہے، پنجاب کی خوشیاں واپس آ رہی ہیں، ایک سال میں صوبہ پنجاب کا ہر شعبہ ترقی کی طرف گامزن ہوا ہے، مریم نواز شریف پنجاب کا فخر ہے۔
