آئینی بینچ نے سی ڈی اے سے مارگلہ ہلز میں غیر قانونی تعمیرات پر مفصل رپورٹ طلب کرلی، سپریم کورٹ کا آرڈر صرف نجی ہوٹل کیلئے تھا،جسٹس جمال مندوخیل ، رپورٹ دیں مارگلہ ہلز میں کتنے کھوکھے ہیں، جسٹس امین الدین
اسلام آباد ( ںٰیوز ڈیسک ) سپریم کورٹ کے آئینی بینچ نے سی ڈی اے سے مارگلہ ہلز میں غیر قانونی تعمیرات پر مفصل رپورٹ طلب کرلی، سماعت کے دو ران جسٹس مسرت ہلالی نے ریمارکس دئیے کہ مارگلہ ہلز میں جتنی بربادی خیبر پختونخواہ میں ہوئی، ہم سوچ بھی نہیں سکتے،جسٹس امین الدین خان کی سربراہی میں سپریم کورٹ کے 7 رکنی آئینی بنچ نے مارگلہ ہلز میں غیر قانونی تعمیرات سے متعلق کیس کی سماعت کی۔
وکیل نجی ہوٹل نے کہا کہ عدالت کے حکم پر ہمارا ریسٹورنٹ کو گرا دیا گیا۔ مارگلہ ہلز میں ابھی 134 کے قریب ہوٹل ریسٹورنٹس کھوکھے موجود ہیں۔جسٹس جمال مندوخیل نے ریمارکس دئیے کہ آپ کہتے ہیں خود کھائیں گے اور نہ کسی کو کھانے دیں گے۔جسٹس محمد علی مظہر نے کہا کہ مارگلہ ہلز محفوظ علاقہ ہے ،ہر قسم کی تعمیرات کو غیر قانونی قرار دیا گیا ۔
ابھی کتنی غیر قانونی تعمیرات مارگلہ ہلز میں باقی ہیں؟ وکیل میونسپل کارپوریشن نے کہا کہ مارگلہ میں 80 سے 132 تعمیرات باقی ہیں۔
جسٹس جمال مندوخیل نے ریمارکس دئیے کہ کیا سپریم کورٹ کا آرڈر صرف نجی ہوٹل کیلئے تھا، عدالت نے مارگلہ ہلز میں تعمیرات کے حوالے سے اصول طے کر دیا ہے، سی ڈی اے اپنا کام کیوں نہیں کرتا۔ڈی جی ماحولیاتی ایجنسی نے بتایا کہ مارگلہ ہلز میں ابھی 50 سے زاہد کھوکھے چل رہے ہیں جو مارگلہ ہلز میں ماحولیاتی مسائل کا سبب بن رہے ہیں۔جسٹس مسرت ہلالی نے کہا کہ سی ڈی اے عدالتی احکامات کی خلاف ورزی کیوں کر رہا ہے؟ وکیل میونسپل کارپوریشن نے کہا کہ مارگلہ ہلز نیشنل پارک میں اسلام آباد کلب بھی آجاتا ہے۔
جسٹس نعیم اختر افغان نے کہا کہ 1960 کے ماسٹر پلان میں سپریم کورٹ بھی مارگلہ نیشنل پارک میں تعمیر ہوئی جس پر جسٹس محمد علی مظہر نے ریمارکس دئیے کہ سی ڈی اے پہلے مارگلہ ہلز کے اطراف میں غیر قانونی تعمیرات کو دیکھ لے، مارگلہ ہلز کے اطراف سے فارغ ہوکر پھر سی ڈی اے سپریم کورٹ کو دیکھ لے۔جسٹس امین الدین نے کہا کہ رپورٹ دیں مارگلہ ہلز میں کتنے کھوکھے ہیں، جسٹس جمال مندو خیل نے کہا کہ بات مارگلہ ہلز کی ہوتی ہے آپ سپریم کورٹ اسلام آباد کلب چلے جاتے ہیں، جسٹس مسرت ہلالی نے کہا کہ جتنی بربادی خیبر پختونخوا مارگلہ ہلز میں ہوئی سوچ نہیں سکتے، بعد ازاں عدالت نے مارگلہ ہلز میں غیر قانونی تعمیرات کی رپورٹ طلب کر لی۔
