بھاگنے والی نہیں ہوںٍ ، سمجھ نہیں آرہا لوگ جھوٹ کیوں بول رہے ہیں، مجھے ڈی چوک میں اکیلا چھوڑ دیا گیا تھا ، میں نے آپ کو بتانا ہے میں وہاں اکیلی تھی ، بانی پی ٹی آئی کی اہلیہ کا ڈی چوک احتجاج میں جاں بحق کارکن کی رہائش گاہ پرکارکنوں سے گفتگو
چارسدہ ( نیوز ڈیسک ) بانی پی ٹی آئی عمران خان کی اہلیہ بشریٰ بی بی کا کہنا ہے بھاگنے والی عورت نہیں ، مجھے ڈی چوک میں اکیلا چھوڑ دیا گیا تھا،چارسدہ میں بانی پی ٹی آئی کی اہلیہ اسلام آباد احتجاج میں جاں بحق ہونے والے پی ٹی آئی کے کارکن تاج الدین کے گھر گئیں، بشریٰ بی بی نے پی ٹی آئی کارکن تاج الدین کی بیوہ کو ایک کروڑ روپے کا چیک پیش کیا، بشریٰ بی بی نے زاہد آباد میں شہید تاج الدین کے نام سے گرلز ہائی اسکول بنانے کا اعلان بھی کیا، کارکنوں سے گفتگو کرتے ہوئے انہوں نے کہا کہ میں نے سب کو کہا تھا مجھے اکیلا نہیں چھوڑنا،مجھے سب نے چھوڑ دیا تھا بہت سے لوگ گواہ ہیں،جو لوگ روڈ خالی کرا رہے تھے وہ بھی گواہ ہیں۔
میں نے صرف آپ کو بتانا ہے کہ میں وہاں اکیلی تھی اور سب چھوڑ کر جا چکے تھے۔
وہ ڈی چوک زبردستی خالی کرا رہے تھے،سمجھ نہیں آرہا تھا کہ لوگ جھوٹ کیوں بول رہے تھے۔انہوں نے کہا کہ جب میں وہاں سے نہیں جا رہی تھی تو سیدھی میری گاڑی پر فائرنگ کی گئی ۔ باقی قافلہ بعد میں آیا۔کسی کو نہیں پتہ تھا کہ میری گاڑی کون سی ہے۔ڈی چوک پر رات ساڑھے 12بجے میں اپنی گاڑی میں تھی۔
لوگ طرح طرح کی باتیں کررہے ہیں ۔میں وہاں سے نہیں ہٹی تھی کیونکہ عمران خان نے ہٹنے کا نہیں کہا تھا۔بانی پی ٹی آئی کی اہلیہ بشریٰ بی بی کا مزید کہنا تھا کہ عمران خان کیلئے نکلنے والوں کو کبھی اکیلا نہیں چھوڑ سکتی تھی۔بانی پی ٹی آئی نے کہا تھا شہدا کے گھرجانا ہے۔ ورکرز بانی کے نام پر شہیدہوئے۔شہادتوں کی وجہ سے بہت تکلیف میں تھی،ان کاکہناتھا کہ پٹھانوں نے ہمیشہ غیرت مندی کا ثبوت دیا۔
انہوں نے کہا کہ اسلام آباد کے ڈی چوک میں احتجاج کے دوران پی ٹی آئی کارکن تاج الدین کی بیوہ کو امدادی چیک دینے کا یہ اقدام تاج الدین کے خاندان کی مالی مدد کیلئے کیا گیا ہے تاکہ اس کے غم کی اس گھڑی میں ان کی مدد کی جا سکے۔ان کا یہ بھی کہنا تھا کہ ہم مشکل گھڑی میں سوگواران کے ساتھ کھڑے ہیں۔ہمارے پرامن احتجاج کے دوران ہونے والی شہادتوں کی وجہ سے بہت تکلیف میں تھی۔پاکستان تحریک انصاف کے ورکرز بانی پی ٹی آئی عمران خان کے نام پر شہید ہوئے ہیں۔
