اسلام آباد 🙁 نیوز ڈیسک ) رہنما مسلم لیگ ن بیرسٹر دانیال چودھری اور طلال چودھری نے کہا ہے کہ آکسفورڈ یونیورسٹی میں بانی پی ٹی آئی جیسی شخصیت کی کوئی جگہ نہیں ہے۔
دانیال چودھری نے اپنے ایک بیان میں کہا ہے کہ آکسفورڈ ایک عالمی شہرت یافتہ ادارہ ہے، بانی پی ٹی آئی کا آرٹیکل ان کی سوچ اور جھوٹ کی عکاسی کرتا ہے، بانی پی ٹی آئی خود کو پاکستان کے سامنے الگ اور مغربی دنیا کے سامنے الگ کردار کے طور پر پیش کرتے ہیں۔
ان کا کہنا تھا کہ یہ آرٹیکل ان کے جھوٹ اور کردار کو بے نقاب کرتا ہے، آکسفورڈ یونیورسٹی میں ایسی شخصیت کی کوئی جگہ نہیں، برطانیہ میں اسامہ بن لادن کو سپورٹ کرنے والی سوچ کو قبول نہیں کیا جائے گا۔
دوسری جانب طلال چودھری نے کہا ہے کہ بانی پی ٹی آئی کرپشن پر اپنے ملک میں سزا بھگت رہے ہیں، اگر بانی پی ٹی آئی جیسا چانسلر منتخب ہوجائے تو یونیورسٹی کا کیا مستقبل ہوگا؟ بہت سی باریک چیزیں سامنے نہیں آتیں۔
انہوں نے مزید کہا کہ اگر کوئی ایسی شخصیت چھوٹے سے سکول کا بھی پرنسپل ہوتو کافی سوال اٹھ جاتے ہیں، بانی پی ٹی آئی پر کرپشن ثابت شدہ، طالبان کے بارے سوچ سب کے سامنے ہے۔
