یہ سارے ڈرائیور لیول کے لوگ ہیں جو جیت کر آگئے ہیں ان کی سیاسی خدمات کیا ہیں،جب تک عمران خان جیل میں بند ہے اس وقت تک فلم بند ہے
جہلم ( نیوز ڈیسک ) سابق وفاقی وزیر فوا د چوہدری کا کہنا ہے کہ شیر افضل مروت جیسے لوگ حادثاتی طور پر سیاست میں آجاتے ہیں، یہ سارے ڈرائیور لیول کے لوگ ہیں جو جیت کر آگئے ہیں ان کی سیاسی خدمات کیا ہیں،جب تک عمران خان جیل میں بند ہے اس وقت تک فلم بند ہے۔نجی ٹی وی سے گفتگو کرتے ہوئے سابق وفاقی وزیر نے مزید کہا کہ اس وقت تو بس آئٹم سانگ چل رہے ہیں ان کو دیکھ کر انجوائے کریں‘؟ ۔
انہوں نے کہا کہ جنرل قمر جاوید باجوہ اچھے آدمی ہیں میں نے ان کے خلا ف بات نہیں کی اور نہ کرنا چاہتا ہوں لیکن میں ان سے مل کر یہ ضرورپوچھنا چاہتا ہوں کہ انہوں نے یہ سب کیوں کیا۔ جنرل باجوہ سے کہا تھا کہ الیکشن کروادیں لیکن انہوں نے ن لیگ سے کہا کہ الیکشن نہیں کروانے۔
موجودہ آرمی چیف سے ہمارا رابطہ ہوجاتا تو چیزیں خراب نہ ہوتیں۔خیال رہے کہ گزشتہ روزپاکستان تحریک انصاف کے رہنماءشیر افضل مروت نے سابق وفاقی وزیر فواد چوہدری پر تنقید کرتے ہوئے کہا تھاکہ فواد چوہدری پولیس کو دیکھ کر ایسے بھاگے تھے جیسے ہتھنی بھاگ رہی ہو۔
فواد چوہدری کا حق نہیں بنتا کہ پی ٹی آئی کی موجودہ قیادت پر تنقید کریں،پی ٹی آئی کی موجودہ قیادت مشکل وقت میں فواد چوہدری کی طرح بھاگی نہیں۔انہوں نے کہا تھا کہ پی ٹی آئی کی قیادت کتنی ہی فیل ہو لیکن کم از کم کڑے وقت میں بانی پی ٹی آئی کے ساتھ کھڑی رہی ہے۔اپنے ایک بیان میں رہنماءپی ٹی آئی نے مزیدکہا تھاکہ فواد چوہدری کے اس بھاگنے کے عمل نے پوری پی ٹی آئی کا سر شرم سے جھکا دیا تھا۔پارٹی پر برا وقت آنے پر بھاگنے والوں کو کوئی حق نہیں پہنچتا کہ وہ پی ٹی آئی کی قیادت کے بارے میں باتیں کریں ۔ہم نے مشکل وقت میں اپنے لیڈر بانی پی ٹی آئی عمران خان کو تنہاءنہیں چھوڑا تھا اور ان کے شانہ بشانہ کھڑے رہے تھے ۔چند مفاد پرستوں نے مشکل وقت آنے پر پارٹی کا ساتھ چھوڑ دیا تھا۔
