دہشت گروں کے طرف سے میاگانو پولیس پوسٹ کو اچانک راکٹ لانچرز اور دیگر چھوٹے ہتھیاروں سے نشانہ بنایا گیا
پشاور ( نیوز ڈیسک ) باجوڑ پولیس نے میاگانوں چیک پوسٹ پر دہشت گردوں کا حملہ ناکام بنا دیا۔ باجوڑ پولیس پولیس کے مطابق پولیس جوانوں نے بروقت اور موثر جوابی کارروائی کرتے ہوئے گزشتہ شب میاگانوں پولیس پوسٹ پر دہشت گردوں کا حملہ ناکام بنایا، رات کی تاریکی میں دہشت گروں کے طرف سے میاگانو پولیس پوسٹ کو اچانک راکٹ لانچرز اور دیگر چھوٹے ہتھیاروں سے نشانہ بنایا گیا، جس کا ضلعی پولیس جوانوں نے جواں مردی سے مقابلہ کرکے حملے کو ناکام بنا دیا۔
بتایا گیا ہے کہ حملے سے ضلعی پولیس جوان محفوظ رہے اور کسی قسم کا جانی نقصان نہیں ہوا، رات کی تاریکی کا فائدہ اٹھا کر دہشت گرد عناصر راہ فرار اختیار ہونے پر مجبور ہوئے، بھرپور موثر جوابی کارروائی پر ڈسٹرکٹ پولیس آفیسر باجوڑ سجاد احمد نے پولیس جوانوں کو شاباش دی اور انہیں نقد انعامات دینے کا بھی اعلان کردیا۔
حال ہی میں صوبی پنجاب میں پولیس کے جوانوں نے جھنگی پوسٹ پر دہشتگرد حملہ ناکام بنا دیا تھا، حملے میں پولیس کے سات اہلکار زخمی ہوئے تھے، پولیس نے ایک بیان میں بتایا تھا کہ جھنگی پولیس چیک پوسٹ خیبرپختونخوا اور پنجاب بارڈر پر واقع ہے، رات کی تاریکی کا فائدہ اٹھاتے ہوئے 15 سے 20 دہشتگردوں نے راکٹ لانچرز، ہینڈ گرینڈ اور لیزر لائٹ گنز سمیت جدید اسلحے سے لیس ہوکر پوسٹ پر حملہ کیا۔
پولیس حکام کہنا تھا کہ پولیس کے بہادر جوانوں نے چیک پوسٹ کا بہترین دفاع کرتے ہوئے دہشتگرد حملہ پسپا کردیا تھا، دہشتگرد حملے کے دوران پولیس کے جوانوں کی برجستہ جوابی کارروائی کے بعد دہشتگرد رات کی تاریکی میں بھاگ گئے تھے۔
