کراچی: ( نیوز ڈیسک ) امیرجماعت اسلامی حافظ نعیم الرحمان نے کہا کہ اسرائیل کو طاقت جوبائیڈن فراہم کر رہا ہے۔ امیرجماعت اسلامی حافظ نعیم الرحمان نے غزہ مارچ کے شرکاء سے خطاب کرتے ہوئے کہا کہ امریکا کی منافقت اوراس کا دہشت گردانہ کردار ہے، امریکا نے عراق، افغانستان میں انسانوں کو قتل کیا، امریکا دہشت گرد اورانسانیت کا دشمن بنا ہوا ہے۔
حافظ نعیم الرحمان نے کہا کہ امریکا صرف جنگ بندی کا بیان دیتا ہے مگرعملاً کچھ نہیں کرتا، دنیا بھر میں لوگ فلسطینیوں سے اظہار یکجہتی کر رہے ہیں، سوشل میڈیا نے امریکا سمیت سب کو ایکسپوزکر دیا ہے۔
امیر جماعت اسلامی نے کہا کہ حماس کے ابابیلوں نے منظم طریقے سے اسرائیل پر حملہ کیا، حماس کے حملے میں دنیا کی بہترین انٹیلی جنس اسرائیل کو منہ کی کھانی پڑی، اگرمسلم حکمران غیرت کا مظاہرہ کرتے تو اسرائیل جرات نہ کرتا۔
انہوں نے مزید کہا کہ او آئی سی صرف اجلاس، قراردادیں پاس کرتے ہیں، او آئی سی والے امریکا کو ناراض نہیں کر سکتے، حماس کی طاقت نظم وضبط اور یکجہتی ہے۔
