ملاقات کے دوران شیشہ رکھنا ہائیکورٹ کے حکم کی خلاف ورزی ہے، بطور پارٹی چیئرمین تمام ہدایات عمران خان سے لیتا ہوں، میں ہمیشہ کہتا ہوں کہ میں عمران خان کا متبادل نہیں ہوں۔ چیئرمین پی ٹی آئی بیرسٹر گوہر خان
اسلام آباد ( نیوز ڈیسک ) پاکستان تحریک انصاف کے چیئرمین بیرسٹر گوہر خان نے کہا ہے کہ ملاقات کے وقت شیشہ اس لئے رکھا گیا کہ میں اور عمران خان کوئی سرگوشی نہ کرسکیں،ملاقات کے دوران شیشہ رکھنا ہائیکورٹ کے حکم کی خلاف ورزی ہے،بطور پارٹی چیئرمین تمام ہدایات عمران خان سے لیتا ہوں، میں ہمیشہ کہتا ہوں کہ میں عمران خان کا متبادل نہیں ہوں۔
انہوں نے نجی نیوز چینل کے پروگرام میں گفتگو کرتے ہوئے کہا کہ سیاست میں مذاکرات کے دروازے بند نہیں ہوتے،اس حکومت کے ساتھ ہم کیا مذاکرات کریں؟کل پارلیمنٹ کا سیشن ہم نے 184تھری کے تحت بلایا تھا، جوڈیشری پر بات ہونی تھی لیکن اسپیکر نے ہمیں بولنے کا موقع نہیں دیا، جہاں تک عمران خان کی رہائی کا تعلق ہے، عمران خان حکومت کے ساتھ ڈیل کے نتیجے میں کسی صورت رہا نہیں ہوں گے، ہم عدالتوں میں جاچکے ہیں، یہ سیاسی نتقامی کیسز ہیں، بغیر دلائل کے فیصلے دیئے گئے، اگر عدلیہ کیسز کو کھلے دل کے ساتھ انصاف کے تقاضے پورے کرے ، تو امید ہے کہ اسی مہینے ہمارے تینوں کیسزکے فیصلے ختم ہوجائیں گے اور عمران خان رہا ہوجائیں گے، عمران خان کو عید سے پہلے ہی رہا ہوجانا چاہیئے تھا،جو کیس چل رہا ہے اس کی اپیل میں اتنا ٹائم نہیں لگنا چاہیے، توشہ خانہ نیب کا کیس ہے ، نیب کے پراسکیوٹر نے خود تسلیم کیا کہ اس کیس کے فیصلے کو معطل کردیا جائے۔
القادر ٹرسٹ کیس میں تو عمران خان ٹرسٹی ہیں ، کچھ لینے دینے کی بات نہیں۔ آج عمران خان سے ملاقات کیلئے گئے تو درمیان میں شیشہ تھا،ان کا پلان ہے کہ عمران خان کو جیل میں زیادہ عرصہ رکھا جائے گا، شیشہ اس لئے رکھا کہ میں اور عمران خان کان میں سرگوشی کرتے تھے وہ نہ کرسکیں، یہ ہائیکورٹ کے حکم کی خلاف ورزی ہے۔ میں پارٹی امور سے متعلق تمام ہدایات عمران خان سے لیتا ہوں، میں ہمیشہ کہتا ہوں کہ میں عمران خان کا متبادل نہیں ہوں، میرے پارٹی میں ہمارے اختلافات ہوتے بھی رہتے ہیں، لیکن ہمارا اتحاد برقرار ہے۔
