اسلام آباد: (نیوز ڈیسک) عدالت نے بانی پی ٹی آئی اور ان کی اہلیہ بشریٰ بی بی کے خلاف غیر شرعی نکاح کے کیس میں خاور مانیکا کو وکیل مقرر کرنے کے لیے وقت دے دیا۔
اسلام آباد کی ڈسٹرکٹ اینڈ سیشن کورٹ میں بانی پی ٹی آئی اور ان کی اہلیہ بشریٰ بی بی کی غیر شرعی نکاح کیس میں سزا کیخلاف اپیل پر سماعت ہوئی۔ سیشن جج شاہ رخ ارجمند کی عدالت میں خاور مانیکا پیش ہوئے، اس موقع پر خاور مانیکا نے عدالت سے سماعت ملتوی کرنے کی استدعا کر دی۔
خاور مانیکا نے استدعا کی کہ مجھے نوٹسز تاخیر سے موصول ہوئے ہیں، وکیل کرنا ہے، کچھ وقت دیا جائے۔ سیشن جج شاہ رخ ارجمند نے استدعا منظور کرتے ہوئے کہا کہ آپ کو ساڑھے 12 بجے تک وقت دے دیتے ہیں، اپنے وکیل کا وکالت نامہ جمع کروا دیں۔
بعدازاں سیشن عدالت نے خاور مانیکا کو وکیل نامزد کرنے کے لیے ساڑھے 12 بجے تک کا وقت دے دیا۔
