مئی والی ذہنیت ملکی ترقی کو روک رہی ہے، انہیں خوف ہے مسلم لیگ ن آگئی ہے تو کہیں ملکی حالات اچھے نہ ہوجائیں، انہیں تکلیف ہے ملک کہیں ترقی نہ کر جائے۔ ترجمان مسلم لیگ ن کی میڈیا سے گفتگو
اسلام آباد ( نیوز ڈیسک ) پاکستان مسلم لیگ ن کی رہنمائ مریم اورنگزیب نے کہا ہے کہ 9 مئی والی ذہنیت ملکی ترقی کو روک رہی ہے۔ پارلیمنٹ ہائوس کے باہر میڈیا سے گفتگو کرتے ہوئے انہوں نے کہا کہ 9 مئی والے ایوان میں پہنچ گئے، 9 مئی والوں نے پارلیمنٹ کے اندر حملہ کیا ہے، آج بھی 2013ء کا رویہ اور ذہنیت دیکھی گئی، پاکستان تحریک انصاف کی سوچ نے نوجوانوں کو بدتمیزی سکھائی ہے۔
ترجمان مسلم لیگ نے کہا کہ وزیراعظم شہباز شریف نے پنجاب کے عوام کی دن رات خدمت کی، ہم نے تو ملک دشمنی نہیں کی مگر انہیں خوف ہے مسلم لیگ ن آگئی ہے تو کہیں ملکی حالات اچھے نہ ہوجائیں، انہیں تکلیف ہے ملک کہیں ترقی نہ کر جائے، انہوں نے تو ساڑھے 4 سال صرف عوام کو لوٹا ہے، کیا خیبرپختونخوا میں دھاندلی نہیں ہوئی؟ انہوں نے دھاندلی کا شور مچا کر ملک میں تماشا لگایا ہوا ہے، اگر کوئی شکایت ہے تو الیکشن کمیشن جائیں، الیکشن کمیشن جاکر کہتے ہیں ثبوت چاہیئے تو ٹی وی سے لیں، یہ اسی طرح شور مچاتے، پیٹتے رہیں گے۔
ان کا کہنا ہے کہ یہ جہاں جیتے وہاں الیکشن شفاف تھے اور جہاں ہارے وہاں دھاندلی کے الزام لگائے، عوام نے انہیں پارلیمان بھیجا لیکن ان کے نصیب میں وہاں بیٹھنا نہیں کھڑا ہونا لکھا ہے، شہبازشریف نے انہیں مل بیٹھنے کی دعوت دی مگر یہ انتشار پسند اور فتنہ پھیلانے والے لوگ ہیں، یہ لوگ ملکی ترقی نہیں چاہتے، انہیں 9 مئی کا بہانہ چاہیئے، یہ چاہتے ہیں ملکی ترقی رک جائے۔
مریم اورنگزیب نے کہا کہ آج اللہ کے کرم سے شہباز شریف کے وزیراعظم کا انتخاب ہوا، پارلیمان کے اندر تمام اتحادیوں نے شہباز شریف کو ووٹ دیا، شہبازشریف نے ایوان میں اپنا وژن دیا ہے اور تمام اتحادی مل کر اسے مکمل کریں گے، پاکستان کے عوام کیلئے خوشخبری ہے کہ شہباز شریف پنجاب کے بعد یہاں خدمت کریں گے، شہباز شریف نے پہلے بھی پاکستان کو ڈیفالٹ ہونے سے بچایا ہے، انہوں نے پہلے بھی اپنی سیاست کو داؤ پر لگا کر ملک کو سری لنکا بننے سے بچایا، ملک کی ٹرانسپورٹ، سڑکیں، اور بجلی کے منصوبوں پر پنجاب میں انتھک محنت کی، اتحادی حکومت پہلے بھی 16 ماہ اکھٹی رہی ہے، ہمارا مقصد تھا 16 ماہ میں ملک کو دیوالیہ ہونے سے بچانا ہے۔
