حادثات میں جاں بحق افراد کے لواحقین کو 10, 10 لاکھ ، شدید زخمیوں کو3،3 لاکھ اور معمولی زخمیوں کو 50، 50 ہزار روپے کے چیک دیئے جائیں گے۔ علی امین گنڈاپور کی گفتگو
پشاور ( نیوز ڈیسک ) وزیراعلیٰ خیبرپختونخوا علی امین گنڈا پور نے صوبے میں بارشوں کے متاثرین کیلئے معاوضے کا اعلان کردیا۔ تفصیلات کے مطابق وزیراعلیٰ خیبرپختونخواعلی امین گنڈاپور نے سیکرٹری ریلیف سے رابطہ کیا اور بارش سے صوبے بھر میں ہونے والے نقصانات اور متاثرین کی رپورٹ مرتب کرنے کی ہدایت کردی، اس موقع پر وزیراعلیٰ خیبرپختونخواعلی امین گنڈاپور نے کہا کہ حادثات میں جاں بحق افراد کے لواحقین کو 10, 10 لاکھ، شدید زخمیوں کو3،3 لاکھ اور معمولی زخمیوں کو 50، 50 ہزار روپے کے چیک دیئے جائیں گے، بارش سے ہونے والے نقصانات پر بھی معاوضے دیئے جائیں گے۔
انہوں نے کہا کہ حادثات کی وجہ منہدم ہونے والے گھروں کے مالکان کو عارضی رہائش گاہ، خوراک اور دیگر ضروریات کی فراہمی کے لئے اقدامات کئے جائیں، بارشوں اور برفباری کی وجہ سے بند ہونے والی سڑکوں کی بحالی کے لئے ضروری اقدامات اٹھائے جائیں، ہنگامی صورتحال سے نمٹنے کے لئے تمام تیاریاں مکمل رکھی جائیں، مصیبت کی اس گھڑی میں صوبائی حکومت متاثرین کے ساتھ ہے، متاثرین کو تنہا نہیں چھوڑا جائے گا ان کی ہر ممکن معاونت کی جائے گی، جاں بحق افراد کے لواحقین کے غم میں برابر کے شریک ہیں۔
بتایا جارہا ہے کہ خیبر پختونخوا میں جاری بارشوں اور لینڈسلائیڈنگ سے ہونے والے حادثات میں اب تک 27 افرادجاں بحق اور38 افراد زخمی ہوگئے ہیں، 129 گھروں کو جزوی،33 گھروں کو مکمل نقصان پہنچا ، صوبائی ڈیزاسٹر مینجمنٹ اتھارٹی (پی ڈی ایم ای)کی رپورٹ میں کہا گیا کہ وزیر اعلی خیبرپختونخوا علی امین گنڈاپور کی ہدایت پرمتاثرین میں امدادی سامان تقسیم کیا جارہا ہے، پی ڈی ایم اے کو جاں بحق افرادکے ورثا اور زخمیوں کو فوری طور پر امدادی چیکس مہیا کرنے کی ہدایت دی گئی ہے، وزیر اعلیٰ نے متاثرہ افراد کو فوری طور پر ریلیف مہیا کرنے کی بھی ہدایت دی ہے۔
انہوں نے کہا کہ بند راستوں کو کھولنے کے لیے فوری اقدامات کیے جائیں، وزیر اعلی نے تمام متعلقہ اداروں، پی ڈی ایم اے، ضلعی انتظامیہ، ریسکیو 1122 کو بھی مکمل الرٹ رہنے کے احکامات جاری کردیے ہیں، عوام کو بروقت ریلیف پہچانے کے لیے تمام تر وسائل بروئے کار لائے جائیں، ڈائریکٹر جنرل پی ڈی ایم اے نے بتایا کہ متاثرہ اضلاع میں امدادی کارروائیاں جاری ہیں۔
