سندھ ہائیکورٹ نے پی ٹی اے اور دیگر فریقین سے آئندہ سماعت پر تفصیلی جواب طلب کرلیا
کراچی ( نیوز ڈیسک ) پاکستان ٹیلی کمیونیکیشن اتھارٹی کو ملک بھر میں ٹوئٹر (ایکس) سروسز بحال کرنے کا حکم دے دیا گیا، سندھ ہائی کورٹ نے کہا ہے کہ ایکس کی سروسز کو بغیر کسی خلل اور بندش کے بحال رکھی جائے، بلا جواز انٹرنیٹ، ویب سائٹس ایکس اور دیگر سوشل میڈیا پلیٹ فارم بند نہ کیے جائیں، پی ٹی اے اور دیگر فریقین سے آئندہ سماعت پر تفصیلی جواب جمع کروائیں۔
تفصیلات کے مطابق سندھ ہائیکورٹ میں ملک بھر میں انٹرنیٹ اور سوشل میڈیا کی بندش سے متعلق کیس کی سماعت ہوئی، جہاں چیف جسٹس ہائیکورٹ جسٹس عقیل عباسی کی سربراہی میں 2 رکنی بینچ نے انٹرنیٹ سروس کی بندش پر اظہار افسوس کیا، سندھ ہائیکورٹ نے 2 صفحات پر مشتمل تحریری حکم نامہ جاری کرتے ہوئے کہا کہ افسوس کے ساتھ کہنا پڑ رہا ہے کہ عدالتی احکامات کے باوجود انٹرنیٹ بند کیا گیا، پی ٹی اے کی جانب سے انٹرنیٹ بند کرنے کی ٹھوس وجوہات نہیں بتائی گئیں، تمام متعلقہ ادارے ملک بھر میں انٹرنیٹ کی بحالی کو یقینی بنائیں۔
عدالت نے حکم دیا کہ عوام کی سوشل میڈیا پلیٹ فارمز تک قانون کے مطابق رسائی کو یقینی بنایا جائے، اگر انٹرنیٹ بندش کی ٹھوس وجوہات نہ بتائی گئیں تو متعلقہ حکام کے خلاف کارروائی کی جائے گی، بغیر کسی ٹھوس وجوہات انٹرنیٹ بند نہیں ہونا چاہیے، نہ ہی رفتار کم کی جائے، اگر یہی صورت حال برقرار رہتی ہے تو آئندہ سماعت پر عدالت کو آگاہ کیا جائے، پی ٹی اے کے وکیل نے بتایا 8 فروری کو الیکشن کے دن وزارت داخلہ اور مختلف اداروں کی رپورٹ پر انٹرنیٹ بند کیا گیا تھا، اضافی جواب جمع کرانے اور متعلقہ حکام سے ہدایات لینے کے لیے مہلت دی جائے، وفاقی حکومت اور سندھ حکومت کے وکیل نے بھی مہلت طلب کی اس لیے کیس کی مزید سماعت 5 مارچ تک ملتوی کردی گئی۔
