الیکشن کمیشن کے مجرمانہ کردار پر پی ٹی آئی ہی نہیں، تمام جماعتیں آوازاٹھا رہی ہیں

الیکشن کمیشن کے پاس مزید کوئی جواز نہیں، فی الفور مستعفی ہوں، عوامی مینڈیٹ کی توہین پر کل پرامن احتجاج کریں گے، وقت آگیا ہے پیپلزپارٹی70ء کی دہائی میں ملک دولخت کرنے کا کفّارہ ادا کرے، کورکمیٹی تحریک انصاف

اسلام آباد ( نیوز ڈیسک ) کورکمیٹی پاکستان تحریک انصاف نے کہا ہے کہ الیکشن کمیشن کے مجرمانہ کردار پر پی ٹی آئی ہی نہیں، تمام جماعتیں آوازاٹھا رہی ہیں، الیکشن کمیشن کے پاس مزید کوئی جواز نہیں، فی الفور مستعفیٰ ہوں، عوامی مینڈیٹ کی توہین پر کل پرامن احتجاج کریں گے۔ اعلامیہ پاکستان تحریک انصاف کی کورکمیٹی کے مطابق عمران خان کو جھوٹے مقدموں میں سزا دینے، بلّے کا نشان چھین لینے اور تحریک انصاف کو زبردستی انتخاب سے باہر رکھنے کی شرمناک کوششوں کے بعد الیکشن کمیشن تحریک انصاف کے نو منتخب اراکینِ پارلیمان کو نہایت مضحکہ خیز تکنیکی بنیادوں پر ڈی سیٹ کرکے عوامی مینڈیٹ پر ڈاکہ ڈالنے کی آخری سازش میں مصروف ہے، الیکشن کمیشن کے ذریعے اپنے مینڈیٹ کی توہین عوام قبول کریں گے نہ ہی دستور و جمہوریت کی قبریں کھودنے والوں کو کبھی معاف کریں گے۔
چیف الیکشن کمشنر اور الیکشن کمیشن کے مجرمانہ کردار پر تحریک انصاف ہی نہیں، صفِ اوّل کی سیاسی جماعتیں آوازیں اٹھا رہی ہیں، ان کا کمیشن میں بیٹھنے کا مزید کوئی جواز نہیں، فی الفور مستعفیٰ ہوں۔ الیکشن کمیشن کی سرپرستی میں عوام کے مینڈیٹ، دستور اور جمہوریت کی کھلی توہین کی راہ روکنا ملک و قوم کے مفاد کیلئے ناگزیر ہے۔ بانی چیئرمین عمران خان نے عوامی مینڈیٹ کی کھلی توہین پر پوری قوم کو کل پرامن احتجاج کی کال دی ہے۔
تمام شعبہ ہائے زندگی سے تعلق رکھنے والے افراد کل گھروں سے نکلیں اور دستور، جمہوریت اور عوام کے ووٹ کے حق کی کھلی بے حرمتی کیخلاف نہایت پرامن مگر مؤثر انداز میں صدائے احتجاج بلند کریں۔ اپنے ووٹ کی حرمت کے تحفّظ کیلئے عوام سے اپیل ہے کہ وہ کل بروز ہفتہ معمولات زندگی خصوصاً کاروباری سرگرمیوں کو معطّل رکھیں اور اپنے مسترد شدہ سیاسی عناصر کے مابین اقتدار کی بندر بانٹ کا مکروہ منصوبہ ناکام بنانے کیلئے اپنا کردار ادا کریں۔ کورکمیٹی تحریک انصاف کا کہنا ہے کہ وقت آگیا ہے کہ پیپلزپارٹی ستّر کی دہائی میں عوامی مینڈیٹ کی کھلی بےحرمتی کے ذریعے پاکستان کو دولخت کئے جانے کا کفّارہ ادا کرے۔