26 ستمبر2011 کو ضابطے کی کارروائی کے بعد بنیادی رکنیت ختم ہوچکی ہے، اکبر بابر نئی جماعت رجسٹر کروا کر سیاست کی اصلاح کا بیڑہ اٹھائیں،اس ٹاؤٹ کو کارکنان نے کبھی منتخب نہیں کیا، ترجمان پی ٹی آئی کا ردعمل
اسلام آباد ( نیوز ڈیسک) پاکستان تحریک انصاف کے ترجمان نے اکبرایس بابر کی پریس کانفرنس کو مضحکہ خیز اور ٹاؤٹ کا خواب قراردے دیا ہے، ان کا کہنا ہے کہ 26 ستمبر2011 کو ضابطے کی کارروائی کے بعد بنیادی رکنیت ختم ہوچکی ہے، اکبر بابر نئی جماعت رجسٹر کروا کر سیاست کی اصلاح کا بیڑہ اٹھائیں،اس ٹاؤٹ کو کارکنان نے کبھی منتخب نہیں کیا۔
ایکس پر جاری اعلامیہ میں پاکستان تحریک انصاف نے اکبر ایس بابر کی پریس کانفرنس پر ردعمل دیتے ہوئے کہا کہ پاکستان تحریک انصاف نے اکبر بابر کی پریس کانفرنس کو بالکل بےمعنی، مضحکہ خیز اور ٹاؤٹ کا خواب قرار دے دیا۔ اکبر بابر کسی بھی پیشکش سے پہلے قوم کو یہ بتائیں کہ تحریک انصاف 26 ستمبر 2011 کو ضابطے کی کارروائی کے بعد ان کی بنیادی رکنیت ختم کرچکی ہے، رکنیت کے خاتمے کے بعد اکبر بابر کا تحریک انصاف سے تو کوئی تعلّق نہیں البتہ ان کے ایجنڈے سے تحریک انصاف کا ہر کارکن بخوبی آگاہ ہے۔
اکبر بابر کیلئے مخلصانہ مشورہ ہےکہ وہ ٹاؤٹ گردی کی راہ ترک کریں اور سیاست میں کچھ کرنا چاہتے ہیں تو الیکشن کمیشن میں اپنی ایک نئی سیاسی جماعت رجسٹر کروا کر سیاست کی اصلاح کا بیڑہ اٹھائیں، پاکستان تحریک انصاف ایک منظم ترین جمہوری جماعت ہے جس میں فیصلہ ساز صرف اور صرف ہمارے کارکن ہیں، تحریک انصاف کا ہر کارکن عمران خان کے نظریے سے پوری طرح وفادار اور جماعت کے نظم اور فیصلہ سازی پر غیرمتزلزل یقین رکھتا ہے۔
تحریک انصاف کا ہرکارکن جانتا ہے کہ ٹاؤٹ کسی نظریے یا اصول کےنہیں اپنے آقاؤں کے حکم کے تابع ہوا کرتے ہیں اور سیاست کیلئے یکسر ناموزوں ہوتے ہیں، جس ٹاؤٹ کے ذریعے تحریک انصاف میں نقب زنی کی مایوس کن کوششیں جاری ہیں اس کی پہلے اپنی کوئی سیاسی پہچان تھی نہ آج ہے، اکبر بابر نامی شخص جتنی دیر تحریک انصاف کا حصہ رہا وہ تحریک انصاف کے تاحیات بانی چیئرمین عمران خان کی سرپرستی ہی کا مرہونِ منّت رہا، اس ٹاؤٹ نے تحریک انصاف کے قیام سے آج تک کسی انٹراپارٹی انتخاب میں یونین کونسل تک کی سطح پر حصہ لیا نہ کبھی تحریک انصاف کے کارکنان نے اسے منتخب کیا، آج بھی مقتدرہ کی آشیرباد کے سوا اکبر بابر کی کوئی پہچان ہے نہ ان کے پاس کرنے کو کوئی کام، تحریک انصاف کا کارکن دیگر تمام سازشوں اور شرانگیزیوں کیطرح اکبر بابر جیسے شخص کی شرارتوں سے بھی نمٹ لے گا، تحریک انصاف اللہ کے فضل وعنایت سے ملک کی مقبول ترین سیاسی جماعت ہے اور اپنے قائد عمران خان کی قیادت میں بطور متحد جماعت سیاست و ریاست کی تعمیر کا ایجنڈا آگے بڑھائے گی۔
