لاہور میں سابق چیف جسٹس پاکستان ثاقب نثار کے گارڈن ٹاؤن میں واقع گھر کے گیراج میں دھماکے کے نتیجے میں دو پولیس اہلکار زخمی ہوگئے، دھماکے سے گھر کی کھڑکیوں کے شیشے ٹوٹ گئے، جبکہ گاڑی کو بھی نقصان پہنچا ہے۔
پولیس کا کہنا ہے کہ کریکر دھماکے سے سابق چیف جسٹس کی سیکیورٹی پر مامور دو پولیس اہلکار زخمی ہوگئے، واقعے کی تحقیقات کی جا رہی ہے۔
پولیس کا مزید کہنا ہے کہ ابتدائی معلومات کے مطابق موٹرسائیکل سوار ملزمان کریکر پھینک کر فرار ہوئے۔
سابق چیف جسٹس کے اہل خانہ محفوظ ہیں
پولیس کا کہنا ہے کہ سابق چیف جسٹس کے اہل خانہ محفوظ ہیں، پولیس کانسٹیبل عامر اور کانسٹیبل خرم معمولی زخمی ہوئے، آئی جی پنجاب نے واقعے کی تمام پہلوؤں سے تحقیقات کرنے کا حکم دے دیا۔
ثاقب نثار کچھ دیر پہلے گھر پہنچے تھے، سیکریٹری
دوسری جانب سابق چیف جسٹس کے سیکریٹری میاں آصف کا کہنا ہے کہ جب دھماکا ہوا تو ثاقب نثار کی گاڑی گیراج میں کھڑی تھی، سابق چیف جسٹس کچھ دیر پہلے اسی گاڑی میں گھر پہنچے تھے، یہ گاڑی ریٹائرمنٹ کے بعد سابق چیف جسٹس کو سرکاری طور پر ملی تھی۔
انہوں نے بتایاکہ دھماکا شدید تھا جس سے گھر کی کھڑکیوں کے شیشے ٹوٹ گئے۔
آئی جی پنجاب نے واقعے کی رپورٹ طلب کرلی
انسپکٹر جنرل ( آئی جی) پنجاب ڈاکٹر عثمان انور نے کیپٹل سٹی پولیس آفیسر (سی سی پی او) لاہور سے رپورٹ طلب کرلی۔ آئی جی پنجاب نے دھماکے میں زخمی اہلکاروں کو علاج معالجے کی بہترین سہولتیں فراہم کرنے کی ہدایت کر دی۔
ترجمان پولیس کا کہنا ہے کہ سی سی پی او لاہور، ڈی آئی جی آپریشنز لاہور، ایس ایس پی آپریشنز سمیت سینئر پولیس افسران موقع پر موجود ہیں۔
