ہیلی کاپٹر دوران پرواز ممکنہ فنی خرابی کے باعث حادثے کا شکار ہوا۔ ترجمان پاکستان نیوی
گوادر (نیوز ڈیسک) صوبہ بلوچستان کے شہر گوادر میں پاک بحریہ کا ہیلی کاپٹر تربیتی پرواز کے دوران حادثے کا شکار ہوگیا۔ ترجمان پاک بحریہ کے مطابق پاکستان نیوی کا سی کنگ ہیلی کاپٹر دوران پرواز ممکنہ فنی خرابی کے باعث حادثے کا شکار ہوا، ہیلی کاپٹر معمول کی پرواز پر تھا کہ اس دوران افسوسناک حادثہ پیش آیا، حادثے کے نتیجے میں پاک بحریہ کے دو افسران اور ایک جوان نے جام شہادت نوش کیا، شہدا میں پائلٹ لیفٹیننٹ کمانڈر جواد، معاون پائیلٹ لفٹیننٹ کمانڈر حمزہ اور ٹیکنیشن حسنین شامل ہیں، پاک بحریہ کی جانب سے حادثے کی وجوہات کا پتا چلانے کے لیے تحقیقات کا آغاز کر دیا گیا۔
بتایا جاتا ہے کہ رواں برس کے ابتدائی دنوں میں صوبہ بلوچستان ہی کے علاقے لسبیلہ میں پاکستان آرمی ایوی ایشن کے ہیلی کاپٹر بھی حادثے کا شکار ہوا، جس میں کور کمانڈر کوئٹہ لیفٹیننٹ جنرل سرفراز علی اور ڈی جی پاکستان کوسٹ گارڈ میجر جنرل امجد سمیت 6 جوان شہید ہوگئے تھے۔
پاکستان آرمی ایوی ایشن کا ہیلی کاپٹر سیلاب زدہ علاقوں میں ریلیف آپریشن کے دوران لاپتہ ہوگیا تھا، کئی گھنٹوں کی تلاش کے بعد ہیلی کاپٹرکا ملبہ موسیٰ گوٹھ سے ملا، اس حوالے سے آئی ایس پی آر کی جانب سے بتایا گیا کہ ہیلی کاپٹر کو حادثہ خراب موسم کے باعث پیش آیا جس کے باعث ہیلی کاپٹر میں سوار کور کمانڈر کوئٹہ لیفٹیننٹ جنرل سرفراز علی اور ڈی جی پاکستان کوسٹ گارڈ میجر جنرل امجد سمیت 6 جوان شہید ہوئے۔
