حکومت نے 15 مہینوں میں آئین اور قانون کا حلیہ ہی نہیں بگاڑا بلکہ غریب سے جینے کا حق بھی چھین لیا۔ سربراہ عوامی مسلم لیگ کا بیان
راولپنڈی ( نیوز ڈیسک ) عوامی مسلم لیگ کے سربراہ اور سابق وفاقی وزیر داخلہ شیخ رشید احمد نے کہا ہے کہ حکومت نے 15 مہینوں میں آئین اور قانون کا حلیہ ہی نہیں بگاڑا بلکہ غریب سے جینے کا حق بھی چھین لیا، حکومت کے باقی ماندہ 20 دن نت نئی خبروں کو جنم دیں گے، حکومت کے جانے کے تو دن گنے جا چکے ہیں لیکن نگران حکومت کے آنے اور جانے کا ابھی فیصلہ ہونا باقی ہے، جاتے جاتے آزادی صحافت کو بھی ہتھکڑیاں پہنا دی گئیں۔
تفصیلات کے مطابق سماجی رابطے کی ویب سائٹ ٹوئٹر پر اپنے ایک بیان میں انہوں نے کہا کہ بجلی، گیس، آٹا، چینی غریب کی دسترس سے باہر ہوگئے، 23 دن کی حکومت نے 23 کروڑ لوگوں پر 50 روپے فی بنیادی یونٹ بجلی کی قیمت بڑھا کر جاتے جاتے 440 وولٹ کا کرنٹ لگا دیا جس کی تنخواہ 35 سے 50 ہزار روپے ہے وہ 15 سے 20 ہزار روپے بجلی کا بل کہاں سے دے گا؟۔
23 دن کی حکومت نے 23 کروڑ لوگوں پر 50 روپے فی بنیادی یونٹ بجلی کی قیمت بڑھا کر جاتے جاتے 440 وولٹ کا کرنٹ لگادیا جس کی تنخواہ 35 سے 50 ہزار روپے ہے وہ 15 سے 20 ہزار روپے بجلی کا بل کہاں سے دے گا15 مہینوں میں آئین اور قانون کا حلیہ ہی نہیں بگاڑه غریب سے جینے کا حق بھی چھین لیا ہے…
— Sheikh Rashid Ahmed (@ShkhRasheed) July 23, 2023
سابق وزیر داخلہ نے کہا کہ موجودہ حکومت نے 15 مہینوں میں ہر وہ کام کیا جس سے ریلیف کی بجائے لوگوں کو تکلیف پہنچے، چادر اور چاردیواری کو روند ڈالا، بچوں اور خواتین کو گھروں سے اٹھایا، بے گناہوں کو جیلوں میں ڈالا، بربریت چنگیزیت اور انتقام کی سیاست کا یہ بدترین دور تھا، حکومت کے باقی ماندہ 20 دن نت نئی خبروں کو جنم دیں گے۔
شیخ رشید احمد نے کہا کہ پی ڈی ایم کا شیرازہ بکھرے گا جب اپنے اپنے انتخابی الیکشن پر لڑیں گے تو انہیں لگ پتہ جائے گا، ہر حکومت یہی کہتی ہے کہ اُن کے پاس الہ دین کا چراغ نہیں جب 85 رکنی کابینہ ہوگی اربوں روپے کی نئی گاڑیاں لی جائیں گی 50 سے زائد غیر ملکی بےکار دورے کیے جائیں گے تو سارا بوجھ عوام پر پڑے گا۔
