اسلام آباد: ( نیوز ڈیسک ) پاک بھارت کشیدگی میں بھارت اوچھے ہتھکنڈوں پر اتر آیا، حالیہ صورتحال میں بھارت کی جانب سے پاکستان پر سائبر حملے کئے جا رہے ہیں۔ وفاقی وزیر انفارمیشن ٹیکنالوجی (آئی ٹی) شزا فاطمہ کے مطابق بھارتی ہیکرز کی جانب سے مختلف وفاقی وزارتوں کی ویب سائٹس پر سائبر حملے ہوئے تاہم پاکستانی آئی ٹی ماہرین نے بھارتی سائبر حملوں کو ناکام بنا دیا، بھارتی ہیکرز کسی بھی ویب سائٹ کو ہیک کرنے اور ڈیٹا تک رسائی میں ناکام رہے۔
انہوں نے کہا کہ بھارت کے سائبر حملوں سے کوئی بہت بڑا مسئلہ نہیں آیا، سائبر حملوں کا کوئی اثر ٹیلی کام پر نہیں آیا، وفاقی وزارتوں کی ویب سائٹس کی ہوسٹنگ این ٹی سی پر ہے، این ٹی سی کے پاس سائبر سکیورٹی کا بہترین سسٹم ہے، قومی اور صوبائی سطح پر کمپیوٹر ایمرجنسی رسپانس ٹیمز تشکیل دی جا چکی ہیں، جبکہ وفاقی اور صوبائی حکومتیں سائبر سکیورٹی کے حوالے سے شہریوں کو آگاہی دے رہی ہیں۔
ان کا کہنا تھا کہ کمپیوٹر ایمرجنسی رسپانس ٹیمز کی جانب سے ایڈوائزریاں جاری کی جا رہی ہیں، سائبر حملوں سے متعلق این ٹی آئی ایس بی بھی فعال ہے، پاکستان سائبر سکیورٹی کے لحاظ سے ٹاپ ممالک کی فہرست میں شامل ہے، گزشتہ دو سالوں میں پاکستان سائبر سکیورٹی کے لحاظ سے ٹاپ ٹیئر ممالک میں آیا ہے، پاکستان کا نام امریکا، یو کے اور ان جیسے ممالک کی فہرست میں آیا ہے۔
شزا فاطمہ نے کہا کہ سوشل میڈیا پر ہونے والی جنگ پر پاکستانی نوجوانوں کو داد دیتی ہوں، پاکستانی میمز بنا کر پاک بھارت کشیدگی کو انجوائے کر رہے ہیں، لوگ سوشل میڈیا پر اتنی کشیدہ صورتحال کو بھی اپنے انداز میں بیان کر رہے ہیں۔ وزیر آئی ٹی کا کہنا تھا کہ ہم پاکستانی کسی سے ڈرنے والے نہیں ہیں، پاکستان نے ہمیشہ امن کی بات کی ہے، پاکستان نے پہلگام واقعے کی مذمت کی ہے، پاکستان خود دہشتگردی سے متاثر ہے۔
