آپریشن سوئفٹ ریٹارٹ میں پاک فوج نے دشمن کو منہ توڑ جواب دیا، وزیراعظم کا آپریشن سوئفٹ ریٹارٹ کے چھ برس گزرنے کے موقع پر افواج پاکستان کی جرات و بہادری، پیشہ ورانہ صلاحیتوں اور قربانی کے جذبے پر خراج تحسین
اسلام آباد ( نیوز ڈیسک ) وزیراعظم شہباز شریف کا کہنا ہے کہ پاکستان اپنی سرحدوں کی حفاظت کی بھرپور صلاحیت رکھتا ہے، آپریشن سوئفٹ ریٹارٹ میں پاک فوج نے دشمن کو منہ توڑ جواب دیا، افواج پاکستان وطن عزیز کی حفاظت کیلئے ہر دم تیار ہیں، وزیراعظم شہباز شریف نے آپریشن سوئفٹ ریٹارٹ کے چھ برس گزرنے کے موقع پر افواج پاکستان کی جرات و بہادری، پیشہ ورانہ صلاحیتوں اور قربانی کے جذبے کو خراج تحسین پیش کیا۔
اپنے ایک بیان میں انہوں نے کہا کہ آپریشن سوئفٹ ریٹارٹ میں پاکستان ایئر فورس نے اپنی عسکری صلاحیتوں اور وطن سے حفاظت کے غیر متزلزل عزم سے دشمن کو واضح پیغام دیا کہ افواج پاکستان ملکی سلامتی کیلئے کسی بھی طرح کی جارحیت کے مقابلے کی بھرپور صلاحیت و قابلیت رکھتی ہے۔
پاکستان علاقائی امن کو فروغ دینے کیلئے ہمیشہ کوشاں رہا ہے لیکن جب کبھی پاکستان کی قومی سلامتی اور استحکام پر ضرب لگانے کی کوشش کی گئی تو پوری قوم سیسہ پلائی دیوار کی مانند متحد ہوگئی۔
وزیراعظم شہباز شریف کا اپنے پیغام میں مزید کہنا تھا کہ آج سے چھ برس قبل 27 فروری 2019ءکے دن پاکستان ایئر فورس کی جانب سے دشمن کو ایک واضح پیغام دیا گیا کہ بھارت کی خطے میں جارحیت کا منہ توڑ جواب دیتے ہوئے ہماری افواج نے یہ ثابت کر دیا کہ پاکستان کی سلامتی کیلئے ہمارے جوان ہر دم تیار ہیں۔وزیراعظم شہباز شریف کا یہ بھی کہنا تھا کہ مجھ سمیت پوری قوم کو اپنی بہادر افواج پر فخر ہے۔
افواج پاکستان کی ملک کی حفاظت کی خاطر عظیم قربانیاں ہیں جسے پاکستانی قوم کبھی فراموش نہیں کر سکتی۔پاک فوج وطن کے دفاع کیلئے ہر وقت تیار ہے ۔ملک کی سلامتی کیلئے پاک فوج کے جوان ہر وقت تیار رہتے ہیں۔پاکستان اپنی سرحدوں کی صلاحیتوں کا دفاع کرنا خوب جانتا ہے اور دشمن کے ہر وار کا منہ توڑ جواب دیا جائیگا۔وزیراعظم کا یہ بھی کہنا تھا کہ 27 فروری کا دن پاکستانی عوام یقیناً سرپرائز ڈے کے نام سے یاد رکھا جائیگا۔ کیونکہ اس دن پاک فضائیہ نے آپریشن سوئفٹ ریٹارٹ کرتے ہوئے دشمن کو منہ توڑ جواب دیاتھا۔
