مٹیاری: ( نیوز ڈیسک ) چیئرمین سینیٹ یوسف رضا گیلانی نے کہا کہ یہ وقت اختلافات کا نہیں، تمام سیاسی جماعتوں کو متحد ہونا چاہئے۔
چیئرمین سینیٹ یوسف رضا گیلانی نے بھٹ شاہ میں مزار پر میڈیا سے گفتگو کرتے ہوئے کہا کہ شاہ عبداللطیف بھٹائی نے امن محبت شفقت کا درس دیا ہے، شاہ صاحب نے عورتوں کے حقوق کی بات کی ہے، ملک کے موجودہ سیاسی معاشی حالات کے پیش نظر ہم سب کو ساتھ ہونا چاہئے۔
شاہ محمود قریشی کو جیل میں ڈالنے کے متعلق صحافی کے سوال پر یوسف رضا گیلانی نے کہا کہ سب کو ملکر کام کرنا ہوگا، یہ وقت نہیں کہ ہم اختلاف رکھیں، میں بھی غریبوں کو نوکریاں دینے پر 9 سال جیل میں رہا، مگر میں نے نہ کسی جج نہ کسی ادارے کا نام لیا نہ ہی شکوہ شکایت کی۔
انہوں نے مزید کہا کہ شہید بینظیر اور آصف زرداری نے بھی جیل کاٹی، ذوالفقار علی بھٹو شہید ہوئے، نوازشریف، شہبازشریف، حمزہ شہباز، مریم نواز کو بھی جیلوں میں جانا پڑا، میں تنقید نہیں کرنا چاہتا کہ کس کو جیل جانا چاہئے کسی کو نہیں، ریلیف دینا عدالتوں کا کام ہے۔
چیئرمین سینیٹ نے کہا کہ مولانا فضل الرحمان میرے دوست ہیں، اگر مولانا صاحب تبدیلی کی بات کرتے ہیں تو پھر یہ لوگ آجائیں گے، پھر مولانا صاحب ہمارے ساتھ بیٹھیں گے، جنرل فیض حمید کا احتساب فوج کا ذاتی ادارہ کر رہا ہے اس پر بات نہیں کروں گا، عدلیہ کو چاہئے کہ جلد نو مئی کے واقعہ پر انصاف کرے۔
یوسف رضا گیلانی نے مزید کہاکہ سکھر حیدرآباد موٹروے منصوبے کی بات سینیٹ میں اٹھائی گئی ہے، سکھر حیدرآباد موٹروے منصوبہ اہم ہے جس کو جلد مکمل ہونا چاہئے۔
