بلاول ہاؤس لاہور میں ہونے والی ملاقات میں سیاسی تعاون پر اصولی اتفاق طے پا گیا
لاہور ( نیوز ڈیسک ) پاکستان پیپلزپارٹی اور مسلم لیگ ن نے حکومت سازی کیلئے باضابطہ رابطہ ہوا ہے، بلاول ہاؤس لاہور میں دونوں جماعتوں کے درمیان ہونے والی ملاقات میں پاکستان مسلم لیگ ن اور پیپلز پارٹی میں سیاسی تعاون پر اصولی اتفاق رائے پایا گیا۔ تفصیلات کے مطابق صدر پی پی پی پی آصف علی زرداری، چیئرمین پی پی پی بلاول بھٹو زرداری سے سابق وزیراعظم محمد شہباز شریف کی بلاول ہاؤس میں ملاقات ہوئی، اس ملاقات میں ملک کی مجموعی صورتحال اور مستقبل میں سیاسی تعاون پر تفصیلی بات چیت کی گئی، دونوں جماعتوں کے قائدین نے ملک کو سیاسی استحکام سے ہم کنار کرنے کے لئے سیاسی تعاون کرنے پر اتفاق کیا اور عزم ظاہر کیا کہ سیاسی عدم استحکام سے ملک کو بچائیں گے۔
مشترکہ اعلامیہ میں بتایا گیا ہے کہ ملاقات میں دونوں جماعتوں نے الیکشن کے بعد کی صورتحال پر مشاورت کی اور تجاویز پر تبادلہ خیال کیا، اس موقع پر پی پی قیادت نے کہا کہ مسلم لیگ ن کی تجاویز کو سینٹرل ایگزیکٹو کمیٹی کے اجلاس میں سامنے رکھیں گے، عوام کی اکثریت نے ہمیں مینڈیٹ دیا ہے، ہم عوام کو مایوس نہیں کریں گے۔ معلوم ہوا ہے کہ پاکستان پیپلزپارٹی کی قیادت سے ملاقات کے لیے بلاول ہاؤس پہنچنے والے مسلم لیگ ن کے وفد میں اعظم نذیر تارڑ، ایاز صادق، احسن اقبال، رانا تنویر، خواجہ سعد رفیق، ملک احمد خان، مریم اورنگزیب اور شزا فاطمہ شامل تھیں۔
