پاکستان ترقی کررہا تھا، نوازشریف کو ہٹاکرپاکستان کو پیچھے کی جانب دھکیلا گیا،رانا ثناءاللہ

ہم 8فروری کے بعد طریقہ کار طے کرکے عوام کے سامنے رکھیں گے،رہنما ن لیگ کی فیصل آباد میں پریس کانفرنس سے خطاب

فیصل آباد(نیوز ڈیسک) پاکستان مسلم لیگ ن پنجاب کے صدر اور سابق وفاقی وزیر داخلہ رانا ثناءاللہ کا کہنا ہے کہ 2018میں پاکستان ترقی کررہا تھا،سازش کے تحت نوازشریف کو ہٹاکرپاکستان کو پیچھے کی جانب دھکیلا گیا۔ ہم 8فروری کے بعد طریقہ کار طے کرکے عوام کے سامنے رکھیں گے۔فیصل آباد میں پریس کانفرنس کرتے ہوئے انہوں نے مزید کہا کہ ہم ہر قیمت پر مہنگائی کے عذاب کو کنٹرول کریں گے تاکہ عوام کو ریلیف ملے۔
سانحہ 9مئی واقعی ایک سانحہ ہے ، ایک گمراہ ٹولہ ریاست پر چڑھ دوڑا۔ بھارت نے9مئی واقعہ کو پوری دنیا میں پھیلایا اور بدنام کیا، ایسے لوگ کسی معافی کے مستحق نہیں ہوسکتے، 9مئی کے واقعات میں کوئی بے گناہ ہے تو اس کو انصاف ملنا چاہیے۔ 2018میں پٹرول 60روپے لٹر تھا،ڈالر 108روپے کا تھا،آج مہنگائی نے پورے ملک کو جکڑا ہوا ہے، کہا جارہا ہے حالات خراب ہیں کیونکہ مہنگائی ہے، ہم دوبارہ مہنگائی کے اس عذاب کو ختم کریں گے۔
ایک سوال کے جواب میں رانا ثناءاللہ نے کہا کہ ملک کو دوبارہ 2017-18ءوالے ٹریک پرلیکر آئیں گے۔ 8فروری کے الیکشن کے بعد ن لیگ مرکز اور صوبے میں حکومت بنائے گی، آئی ایم ایف کے ساتھ معاہدہ ہم نے نہیں کیا۔ ملک پرایک نمونے کو مسلط کیاگیا۔جس نے 4سالوں میں ملک کو تباہی کے دہانے لاکھڑا کیا، جون میں آئی ایم ایف معاہدہ ختم ہورہا ہے، اللہ پاکستان کو استقامت دے تاکہ ہم دوبارہ آئی ایم ایف کے جال میں نہ پھنسیں۔
سابق وفاقی وزیر داخلہ نے مزید کہا کہ مولانا زاہد محمود قاسمی نے مسلم لیگ ن کی حمایت کا اعلان کیا ہے، میں مرکزی علما کونسل کی صوبائی قیادت کا شکرگزار ہوں، مرکزی علما کونسل دینی مشن پر عمل پیرا ہے، ہم تحفظ ناموس رسالت ،تحفظ ختم نبوت اور شان صحابہ کو اپنے ایمان کا حصہ سمجھتے ہیں، مسلم لیگ ن کو کامیابی حاصل کرنے میں مدد ملے گی۔