22 فروری 2003 کو پاکستان کے سابق فاسٹ بولر شعیب اختر نے آئی سی سی کرکٹ ورلڈ کپ کے دوران کیپ ٹاؤن میں انگلینڈ کے خلاف 161.3 کلومیٹر فی گھنٹہ (100.2 میل فی گھنٹہ) کی رفتار سے بین الاقوامی کرکٹ میں تیز ترین گیند کرائی۔
تفصیلات کے مطابق اس ڈلیوری کا سامنا انگلینڈ کے اوپنر نک نائٹ نے کیا، اس اوور کی باقی پانچ گیندیں 153.3 کلومیٹر فی گھنٹہ، 158.4 کلومیٹر فی گھنٹہ، 158.5 کلومیٹر فی گھنٹہ، 157.4 کلومیٹر فی گھنٹہ، اور 159.5 کلومیٹر فی گھنٹہ کی رفتار سے ریکارڈ کی گئیں جس کی اوسط 158.06 کلومیٹر فی گھنٹہ تھی۔
شعیب اختر 100 میل فی گھنٹہ کی رکاوٹ کو عبور کرنے والے پہلے بولرتھے۔
شعیب اختر جنہیں راولپنڈی ایکسپریس کے نام سے بھی جانا جاتا ہے ان کا شمار دنیا کے تیز ترین باؤلرز میں ہوتا ہے۔
اپنے سخت رویے اور خام رفتار کے ساتھ فاسٹ بولر نے بہت سے عظیم بلے بازوں پر غلبہ حاصل کیا جن میں سچن ٹنڈولکر، راہول ڈریوڈ، برائن لارا، رکی پونٹنگ، اور بہت سے دوسرے شامل ہیں۔
فاسٹ بولر نے 46 ٹیسٹ کھیل کر 178 وکٹیں حاصل کیں، 163 ون ڈے میں 247 وکٹیں اور 15 ٹی ٹوئنٹی میں 19 وکٹیں حاصل کیں۔
2002 میں لاہور میں نیوزی لینڈ کے خلاف تیسرے ون ڈے میں راولپنڈی ایکسپریس نے 161 کلومیٹر فی گھنٹہ کی رفتار سے گیند کی۔
اسی سیریز کے پہلے میچ میں شعیب نے 159.9 کی رفتار سے بولنگ کی، اس میچ میں شعیب اختر نے اپنی بہترین کارکردگی کا مظاہرہ کرتے ہوئے 1.77 کی ناقابل یقین اکانومی پر صرف 16 رنز دے کر 6 وکٹیں لے کر نیوزی لینڈ کی بیٹنگ لائن اپ کو تباہ کر دیا، ان کے 6 میں سے 4 آؤٹ کلین بولڈ ہوئے۔
اسی سال شارجہ کپ کے چوتھے میچ میں سری لنکا کے خلاف اختر نے 159.5 پر ایک اور گیند کی، تاہم یہ میچ ان کا بہترین نہیں تھا کیونکہ وہ 9 اوورز میں 51 رنز دے کر پاکستان کے مہنگے ترین بولر تھے۔
