ریاست کیلئے زخم کھانے والوں کو پیغام ہے کہ فارن ایجنٹ نظام عدل سے بالاتر ہے،وفاقی وزیر طلاعات
اسلام آباد (نیوز ڈیسک) وفاقی وزیر اطلاعات مریم اورنگزیب کا کہنا ہے کہ پولیس کے سر پھاڑنے،عدالتی نظام ،ریاست پر حملہ آور شخص کو ضمانت کا بنڈل پیکج ملا۔ تفصیلات کے مطابق وزیر اطلاعات مریم اورنگزیب نے چیئرمین تحریک انصاف عمران خان پر کڑی تنقید کی ہے۔ انہوں نے ٹویٹر پر اپنے بیان میں کہا ہے کہ ریاست کے لیے زخم کھانے والوں کو پیغام ہے فارن ایجنٹ عمران خان نظام عدل سے بالا تر ہے،عمران خان نے پیٹرول بم پولیس اور رینجرز پر نہیں عدالتی احکامات پر پھینکے۔
پولیس کے سر پھاڑنے ،عدالتی نظام ، ریاست پر حملہ آور دہشت گرد کو ضمانت کا بنڈل پیکج ملا۔ ریاست کے لئے زخم کھانے والوں کو پیغام ہے کہ فارن ایجنٹ گھڑی چور آئین، قانون اور نظام عدل سے بالا تر ہے۔ #دہشتگرد_عمران نے پٹرول بم پولیس اور رینجرز پہ نہیں عدالتی احکامات پہ پھیلیں ہیں
— Marriyum Aurangzeb (@Marriyum_A) March 18, 2023
قبل ازیں مریم اورنگزیب نے برطانوی نشریاتی ادارے کو انٹرویو دیتے ہوئے کہا کہ زمان پارک میں ریاستی اداروں کو چیلنج کیا جا رہا ہے، بار بار وقت ملنے کے باوجود عمران خان عدالت میں پیش نہیں ہوئے، وہ غیر قانونی عمل سے عدالت پر اثر انداز ہونے کی کوشش کر رہے ہیں، پولیس کرپشن کیسز میں عمران خان کو گرفتار کرنے کے لئے عدالتی احکامات کی تعمیل پر زمان پارک میں موجود تھی۔
انہوں نے کہا کہ زمان پارک میں کارروائی کے دوران پولیس کے پاس کوئی ہتھیار نہیں تھے، پولیس اہلکاروں کو ڈنڈوں اور پتھروں سے مارا گیا، ان کی گاڑیوں پر پٹرول بموں سے حملے کئے گئے۔ اس مجرمانہ فعل کی وجہ سے ڈی آئی جی آپریشنز سمیت 65 پولیس اہلکار زخمی ہوئے۔ مریم اورنگزیب کا کہنا تھا کہ عمران خان نے گرفتاری سے بچنے کے لئے پارٹی کارکنوں، خواتین اور بچوں کو انسانی ڈھال کے طور پر استعمال کیا۔ انہوں نے کہا کہ حالیہ آڈیو لیک اس بات کا ثبوت ہے کہ عمران خان نے اپنے کارکنوں اور سینئر عہدیداروں سے پٹرول منگوا کر پٹرول بموں میں استعمال کروایا۔عمران خان غیر قانونی عمل سے عدالت پر اثر انداز ہونے کی کوشش کر رہے ہیں،آئین پاکستان میں قانون سب کے لئے برابر ہے۔