لاہور: ڈکیتی مزاحمت پر خاتون قتل، بہنوئی اور بہن زخمی

لاہور (بیورو رپورٹ) مغلپورہ کے علاقے میں ڈکیتی مزاحمت پر دو نامعلوم موٹرسائیکل سوار مسلح ڈاکوﺅں نے فائرنگ کر کے ایک خاتون کو قتل اور مقتولہ کی بہن اور بہنوئی کو زخمی کردیا ہے جبکہ ڈاکو لوٹ کرنے کے بعد فرار ہوگئے۔
بتایا گیا ہے کہ مقتولہ خاتون اپنی بہن اور بہنوئی کے ہمراہ واپس گھر پہنچی تھی کہ گھر کی دہلیز سے چند گز کے فاصلے پر مسلح ڈاکوﺅں نے انہیں روک لیا اور گن پوائنٹ پر لوٹ مار شروع کردی۔
اسی دوران متاثر خاتون نے ڈاکوﺅں کو دبوچنے کی کوشش کی تو ڈاکوﺅں نے فائرنگ کردی۔ ڈکیتی مزاحمت کی واردات کی اطلاع ملتے ہی ایس پی خرم شعیب جانباز پولیس فورس کے ہمراہ جائے وقوعہ پر پہنچ گئے جہاں انہوں نے متاثرہ خاندان کے اہل خانہ سے ہمدردی کا اظہار کرتے ہوئے انہیں مکمل انصاف فراہم کرنے کی یقین دہانی کروائی۔ پولیس نے جائے وقوعہ سے شواہد اکھٹے کرنے کے بعد نامعلوم افراد کے خلاف مقدمہ درج کرلیا ہے۔