سپریم کورٹ نے سابق صدر آصف زرداری کے نیب ریفرنس منتقلی معاملے کی درخواست نیب وکیل کی استدعا پر آئندہ ماہ تک ملتوی کردی۔
جسٹس عمر عطا بندیال نے سپریم کورٹ میں سابق صدر آصف زرداری کے نیب ریفرنس منتقلی معاملے کی درخواست پر سماعت کی۔
نیب وکیل نے سماعت کے موقع پر استدعا کی کہ اسے آئندہ ماہ تک ملتوی کیا جائے جسٹس بندیال نے کہا کہ اس معاملے پر سپریم کورٹ کی ہدایات ہیں، ان کو دیکھ لیں گے۔
جسٹس عمر عطا بندیال نے کہا کہ نیب وکیل جہانزیب بھروانہ کو کورونا ہوگیا ہے، سماعت ملتوی کرتے ہیں، اس پر وکیل آصف زرداری فاروق نائیک نے کہا کہ سماعت 15 روز تک ملتوی کردیں۔
جسٹس بندیال نے کہا کہ جہانزیب بھروانہ 15 روز میں ریکور ہوں گے، اس لیے ایک ماہ کی تاریخ دیتے ہیں۔
فاروق نائیک نے عدالت کو بتایا کہ میں نے بھی کووڈ ویکسین کا پہلا ڈوز لگوایا ہے، اینٹی باڈیز دوسرے ڈوز کے بعد بنتی ہیں، اس پر جسٹس عمرعطا بندیال نے کہا کہ آپ اپنا خیال کیجیے گا۔
