ڈھاکہ(سپورٹس ڈیسک) پاکستان اور بنگلادیش کی ٹیموں کے درمیان دوسرا ٹی ٹوئنٹی میچ آج کھیلا جائے گا۔تفصیلات کے مطابق ڈھاکہ کے شیر بنگلا کرکٹ اسٹیڈٰیم میں آج پاکستان اور بنگلادیش کے درمیان ٹی ٹوئنٹی سیریز کا دوسرا میچ کھیلا جائے گا جو پاکستانی وقت کے مطابق سہہ پہر 1 بجے شروع ہوگا۔
واضح رہے کہ گزشتہ روز کھیلے گئے پہلے میچ میں پاکستان نے سنسنی خیز مقابلے کے بعد بنگلادیش کو 4 وکٹوں سے شکست دی تھی جبکہ ٹی ٹوئنٹی ورلڈ کپ میں آوٹ آف فارم رہنے والے حسن علی 3 وکٹیں لے کر میچ کے بہترین پلیئر قرار پائے تھے۔
گذشتہ روز کھیلے گئے میچ میں بنگلادیش نے ٹاس جیت کر پہلے بیٹنگ کرنے کا فیصلہ کیا اور بنگلادیش کی پوری ٹیم مقررہ 20 اوورز میں 7 وکٹوں کے نقصان پر 127 رنز اسکور کرسکی جبکہ پاکستان کو جیت کے لیے 128 رنز کا ہدف دیا جسے پاکستان نے سنسنی خیز مقابلے کے بعد اپنے نام کرلیا۔
پاکستان ٹیم نے 19 اعشاریہ 2 اوورز میں 6 کھلاڑیوں کے نقصان پر 132 رنز اسکور کیے اور یوں پاکستان نے بنگلادیش کو 4 وکٹوں سے شکست دے دی۔
پاکستان ٹیم کی بیٹنگ کا آغاز خاصی مایوس کن رہا اور تیسرے اوور کی چوتھی گیند پر محمد رضوان صرف 11 رنز بناکر پویلین لوٹ گئے جس کے بعد اگلے ہی اوور میں بابر اعظم بھی 7 رنز بناکر آوٹ ہوگئے۔
پاکستان ٹیم کی جانب سے فخر زمان اور خوشدل شاہ نے بہترین کھیل کا مظاہرہ کرتے ہوئے 35، 35 رنز اسکور کیے جبکہ میچ کے اختتام کو شاداب خان نے اور بھی مزیدار بنا دیا۔
شاداب خان نے محض 10 گیندوں پر 21 رنز اسکور کیے جس میں انہوں نے 2 چھکے اور 1 چوکا بھی مارا جو ٹیم کو کامیابی کی طرف لے گیا۔
بنگلادیش کی جانب سے تسکین احمد نے 2 کھلاڑیوں کو آوٹ کیا جبکہ مہدی حسن، مستفیظر رحمان اور شریف الاسلام نے 1، 1 کھلاڑی کو آوٹ کیا۔
دووسری جانب بنگلادیش کی جانب سے پہلی بیٹنگ کرتے ہوئے عاطف حسین 34 گیندوں پر 36 رنز بناکر نمایاں رہے جبکہ اس کے علاوہ نورالحسن نے 22 گیندوں پر 28 رنز اسکور کرسکے جبکہ مہدی حسن 20 گیندوں پر 30 رنز بناکر ناٹ آوٹ ہوگئے۔
پاکستان کی جانب سے حسن علی نے 3 کھلاڑیوں کو آوٹ کیا اور محمد وسیم نے 2 کھلاڑیوں کو آوٹ کیا جبکہ شاداب خان، محمد نواز نے ایک ایک وکٹ حاصل کی۔
خیال رہے سیریز کا تیسرا ٹی ٹوئنٹی انٹرنیشنل میچ 22 نومبر کو اسی مقام پر کھیلا جائے گا جبکہ دورہ بنگلادیش کے دوران پاکستان ٹیم بنگلا دیش سے 2 ٹیسٹ میچز بھی کھیلے گی۔
ٹیسٹ سیریز کا پہلا میچ 26 نومبر سے 30 نومبر کے درمیان کھیلا جائے گا جبکہ دوسرا میچ 4 دسمبر سے شروع ہوگا جو 8 دسمبر تک جاری رہے گا۔
