نوازشریف کی جعلی ویکسی نیشن کا اندراج پاکستان کے خلاف سازش ہے، نوازشریف کی بیٹی اور کچھ ایم پی ایز نے مل کر یہ سازش تیارکی جس کا مقصد تھا کہ پاکستان میں ویکسی نیشن کا عمل ٹھیک نہیں ہے۔ معاون خصوصی شہباز گل
اسلام آباد (حالات نیوز ڈیسک) : وزیراعظم عمران خان کے معاون خصوصی شہباز گل نے سابق وزیراعظم نواز شریف کی ویکسی نیشن کے معاملے کو ایک سازش قرار دے دیا ۔ تفصیلات کے مطابق وفاقی دارالحکومت اسلام آباد میں پریس کانفرنس سے خطاب کرتے ہوئے شہباز گل نے کہا کہ کورونا وائرس نے دنیا بھر کو چینلجز سے دو چار کیا۔ وزیراعظم عمران خان نے کہا کہ کورونا میں غریب کو بچانا ہے۔
وزیراعظم عمران خان نے کورونا میں مشکل حالات کا سامنا کیا۔ میں وزیراعظم سے یہ بھی کہتا رہا کہ لاک ڈاؤن نافذ کریں، ہر شخص لاک ڈاؤن کے حق میں تھا لیکن وزیراعظم عمران خان کو غریب کا احساس تھا۔ انہوں نے کہا کہ چین نے مشکل وقت میں پاکستان کی مدد کی اور کورونا کی ویکسین فراہم کی۔
کورونا کی مشکل صورتحال میں ایک ملک نے ہمیں ریڈ لسٹ میں ڈال دیا۔
سابق وزیراعظم نواز شریف کی کورونا ویکسی نیشن کی جعلی انٹری کے معاملے پر شہباز گل نے کہا کہ نواز شریف اور ن لیگی ایم پی ایز نے جعلی انٹری کی سازش کی۔ نیوزی لینڈ کی ٹیم کی واپسی کے بعد ویکسی نیشن کے عمل پر حملہ کیا گیا۔ نواز شریف کی جعلی ویکسی نیشن کا اندراج پاکستان کے خلاف سازش ہے۔ شہباز گل کا کہنا تھا کہ جعلی ویکسی نیشن کے واقعے کے 6 کردار ہیں۔
نوازشریف کی بیٹی اور کچھ ایم پی ایز نے مل کر یہ سازش تیارکی۔ انہوں نے کہا کہ اس سازش میں چودھری شہباز،ابوالحسن ،عادل رفیق اور نوید نامی کردار شامل ہیں۔ سازش کا مقصد تھاکہ پاکستان میں ویکسی نیشن ٹھیک نہیں ہے۔ انہوں نے بتایا کہ عادل رفیق کو ایم پی اے چودھری شہباز نے بھرتی کروایا۔ کوٹ خواجہ سعید اسپتال میں ن لیگ خوردبرد کرتی رہی۔
ن لیگ ہی نے سب سے پہلے جعلی ویکسین کی خبرپھیلائی۔ شہباز گل نے بتایا کہ نوید نامی شخص ملک سے باہر بھاگا ہوا ہے ، نوید نامی شخص شاد باغ کا رہنے والا ہے۔ انہوں نے کہا کہ ہم کس کس کونکالیں گے ،ہر ادارے میں یہ حرکت کرکے گئے ہوئے ہیں۔ انہوں نے کہا کہ ویڈیو بنانے والی خاتون نے ذمہ داری لگائی ،ایم پی ایز نے عمل کروایا۔ مریم نوازکے بیان کےبعد بھارتی میڈیا نے بھی اس معاملے کو اُٹھایا ۔
