24

لاہور میں ڈیلٹا کے بعد کورونا کی ایک اور قسم کے کیسز سامنے آگئے

صوبائی دارالحکومت میں گزشتہ 24 گھنٹوں کے دوران ڈیلٹا کے 12 جبکہ ایپسیلون کے 3 کیسز سامنے آئے

لاہور(حالات بیورو رپورٹ) لاہور میں ڈیلٹا کے بعد کورونا کی ایک اور قسم کے کیسز سامنے آگئے، صوبائی دارالحکومت میں گزشتہ 24 گھنٹوں کے دوران ڈیلٹا کے 12 جبکہ ایپسیلون کے 3 کیسز سامنے آئے۔تفصیلات کے مطابق صوبائی دارلحکومت لاہور میں کورونا سے متاثر تشویشناک مریضوں میں اضافہ ہوتا جارہا ہے ، شہر میں ڈیلٹا اور ایپسیلون وائرس کے کیسز میں سامنے آرہے ہیں۔
محکمہ صحت کی رپورٹ کے مطابق صوبے میں گزشتہ 24گھنٹوں میں ڈیلٹا اورایپسیلون قسموں کے کل 15 کیسز رپورٹ ہوئے۔ اب تک پنجاب میں ڈیلٹا قسم کے 550 مریض جبکہ ایپسیلون قسم کے 49 مریض رپورٹ ہوچکے ہیں۔ محکمہ صحت پنجاب کے مطابق صرف اور صرف ویکسینیشن ہی کورونا کیخلاف موثرعلاج ہے، کورونا ویکسین لگوانے والے افراد متاثرہوسکتے ہیں مگر ان افراد میں بیماری کی شدت کم ہوگی، کورونا سے بچاو کیلئے 15سال سے زائدعمر کے تمام افراد کا فوری ویکسین لگوانا ناگزیر ہے۔

دوسری جانب صوبے میں مہلک وبا کی صورتحال کے حوالے سے صوبائی وزیر صحت ڈاکٹر یاسمین راشد کی جانب سے بتایا گیا ہے کہ کورونا کی چوتھی لہر کی شدت کم ہو رہی ہے اور گزشتہ 24 گھنٹوں میں پنجاب میں کورونا کے 880 کیس رپورٹ ہوئے ہیں، جبکہ سرکاری ہسپتالوں میں کورونا کے مریضوں کی گنجائش اضافہ کے بعد اب 50 فیصد تک پہنچ چکی ہے۔ وزیر صحت کے مطابق پنجاب میں روزانہ 4 لاکھ سے زائد افراد کو کورونا سے بچاؤ کی ویکسین لگائی جا رہی ہے، اب تک پنجاب کی 5 کروڑسے زائد آبادی کو کورونا سے بچاؤ کی پہلی ڈوز لگ چکی ہے اور کوشاں ہیں کہ سال کے آخر تک 70 فیصد آبادی کو کورونا سے بچاؤ کی ویکسین لگ جائے۔
جبکہ واضح رہے کہ ملک بھر میں عالمی وبا کورونا وائرس کے باعث گزشتہ 24 گھنٹوں کے دوران مزید 81 افراد انتقال کر گئے جبکہ 1ہزار 897 نئے کیسز بھی سامنے آئے ،ملک میں کورونا کیسزکی شرح کم ہو کر تقریبا ً4 فی صد کے قریب رہ گئی ہے۔

اس خبر پر اپنی رائے کا اظہار کریں

اپنا تبصرہ بھیجیں