شمالی وزیرستان میں دہشتگردوں نے ملٹری چیک پوسٹ پر فائرنگ کردی

راولپنڈی (حالات نیوز ڈسک) شمالی وزیرستان میں دہشتگردوں نے ملٹری چیک پوسٹ پر فائرنگ کردی، فائرنگ سے پاک فوج کا ایک سپاہی شہید ہوگیا، شہید سپاہی کا تعلق بہاولنگر سے تھا، علاقے میں دہشتگردوں کے خاتمے کیلئے کلیئرنس آپریشن جاری ہے۔ پاک فوج کے شعبہ تعلقات عامہ آئی ایس پی آر کے مطابق شمالی وزیرستان میں دہشتگردوں نے ملٹری چیک پوسٹ پر فائرنگ کردی، فائرنگ کے نتیجے میں پاک فوج کا ایک سپاہی شہید ہوگیا۔فائرنگ شمالی وزیرستان کے علاقے غریوم میں کی گئی۔ چوکی پر موجود جوانوں نے بھرپور جوابی کارروائی کی، سکیورٹی فورسز کی جانب سے دہشتگردوں کی فائرنگ میں بھرپور جوابی فائرنگ کی گئی۔ فائرنگ کے تبادلے میں 29 سالہ سپاہی شاہد شہید ہوگیا۔ شہید سپاہی شاہد کا تعلق بہاولنگر سے تھا، علاقے میں دہشتگردوں کے خاتمے کیلئے کلیئرنس آپریشن جاری ہے۔ آئی ایس پی آر کی جانب سے کہا گیا کہ پاک فوج دہشت گردی کے ناسور کے خاتمہ کے لیے پرعزم ہے۔