وفاقی وزیر سائنس اینڈ ٹیکنالوجی فواد چوہدری کہتے ہیں کہ ہمیں ضرورت نہیں کہ ہم سب کے بچوں کے ماں باپ بن جائیں، عبایا لینے والے عبایا لیں، جینز پہننے والے جینز پہنیں، ہمیں کسی پر پابندی نہیں لگانی چاہیے۔
راولپنڈی کی نجی یونیورسٹی میں انٹرنیشنل میڈیا کانفرنس سے خطاب کرتے ہوئے فواد چوہدری نے کہا کہ ہماری ٹیکنالوجی کو عدالتوں کی وجہ سے دھچکا لگا۔
فواد چوہدری نے کہا کہ 2014 کے عدالتی فیصلوں کے باعث ڈیجٹل کمپنیوں سے ہمارا تعلق خراب ہوا جبکہ پی ٹی اے نے ٹک ٹاک پر پابندی لگادی۔
فواہد چوہدری نے یہ بھی کہا کہ جب تک ریاستی پالیسیاں نہیں بدلیں گی ملک میں سرمایہ کاری نہیں آئے گی۔
اُن کا کہنا تھا کہ سیاسی اور معاشی آزادی انسان کی زندگی بناتی ہے، کام وہ کریں جو آپ پسند کریں۔
وفاقی وزیر نے یہ بھی کہا کہ جسے پڑھنے کا شوق ہے وہ پڑھیں جسے ویڈیو کا شوق ہے وہ ویڈیو کھیلیں، وہ دور گئے کہ پڑھو گے لکھو گے بنو گے نواب۔
اُنہوں نے کہا کہ آج تو بیس سال کا شخص ارب پتی بن جاتا ہے۔
وفاقی وزیر سائنس اینڈ ٹیکنالوجی فواد چوہدری کا مزید کہنا تھا کہ بجلی بن گئی مگر ترسیل میں مسائل ہیں۔
